Diasabra anochi a tuma luga e certamen di beyesa Miss Plus 2021, caminda cu e simpatica Isalys Geerman a sobresali y a gana e certamen.
E certamen riba su mes tabatin un cambio grandi, mirando cu e prome edicion tabata uno virtual y awo, a tuma e iniciativa pa bay den un certamen fisico, cu a tuma luga den Cas di Cultura.
Presidente di Miss Plus Aruba y di TyCreates Aruba Foundation, Tyron Faro a keda hopi satisfecho cu e logro aki, cual por bisa cu e certamen riba su mes a termina na un manera mahestuoso, unda cu shete candidata sumamente fuerte a concursa.
Meta di e certamen ta pa traha riba e confiansa cerca e ser femenino cu tin un tiki mas curva. Esaki mirando cu den comunidad nan ta balota, ta papia malo di nan. Sinembargo cu e certamen aki ta mustra cu nan tambe por competi den un certamen di beyesa, nan tambe por cana riba sapato halto y tambe den un badpak, desfila den un trahe di gala. Cu e certamen aki ta logrando esey.
Mirando e trayectorio di e candidatanan na cuminsamento di e certamen, compara cu a mustra diasabra anochi, e calidad di e candidatanan tabata hopi halto.
Entusiasmo di e publico tabata uno hopi halto. Na momento cu e candidatanan tabata den nan preparacion, nan tabata haya hopi atencion cerca e publico. Ta hopi bunita pa mira cu cada candidata ta bin cu un grupo grandi di apoyo. No solamente apoyando nan candidata faborito, sino tur otro candidata.
Ya caba e certamen pa 2022 ta na caminda. Faro a comenta cu meta pa ta pa yega na 10 candidata, pero cu 7 ta mas cu satisfecho. Tin biaha calidad ta miho cu cantidad. Esey ta loke cu a demostra diasabra anochi, cu 7 candidata cual ta basta bon, pero cu a demostra un calidad di presentacion, calidad di candidata super halto.
Isalys Geerman mes, como Miss Plus Aruba, a conta cu su preparacionnan a bay super bon. E ta conta cu dia 25 di juli el a cuminsa prepara y awo, corona como Miss Plus Aruba, su trabao a cuminsa.
Prome cu e coronacion, e tabata super contento di a participa den e certamen. Sin descarta e trabao inmenso cu e otro seis candidatanan a eherce.
Isalys tin un conseho pa tur esunnan cu kier participa pa e siguiente certamen: “Si bo ta sinti bo cla pa participa otro aña, si bo tin e autoconfiansa, e briyo, e animo, bin participa otro aña pa Miss Plus Aruba 2022.”
Por ultimo Geerman a bisa pa semper stima bo mes, pone bo mes na prome luga y enfoca riba bo metanan pasobra sigur bo lo logr’e.
