Minister Geoffrey Wever ta bek na Aruba despues di un mision comercial hunto cu pareha real na New York. Rey Willem-Alexander a invita Minister Wever como invitado di honor pa forma parti di e delegacion. E delegacion a bishita diferente organisacion, Wever sigur a sa di saca cara di Aruba durante e bishita aki. Hunto den e delegacion di e Pareha Real, Minister Geoffrey Wever tabata acompaña pa Minister Liesje Schreinemacher di Hulanda, Embahador Birgitta Tazelaar, y Minister Plenipotenciario Zulema Dabian-Erasmus.
E delegacion tabatin e oportunidad pa explora e area conoci como ‘Little Caribbean’ cual ta consisti grandemente di diferente grupo di descendencia Caribense y presencia e desaroyo economico y comercial di e area.
CaribBeing tabata un di e stopnan pa e delegacion. CaribBeing ta un empresa den e area ‘Little Caribbean’ pero cu acohida regional. Aki por a presencia diferente producto procedente di Caribe riba exhibicion pa benta, incluso un variedad di producto di Aruba, manera e.o. Bushi Beard Co, Arubalife Organics, Hot delight, y Bath & Body.
Minister Wever tabatin un combersacion ameno cu e empresario di CaribBeing, Shelley Worrell. A palabra cu lo busca pa expande nan portfolio di e productonan procedente di Aruba pa bende na New York, mientras cu nan ta sigui promove nan negoshi den e ciudad y cercania.
E biahe aki ta ilustra e bon relacion den Reino Hulandes, y e stop na e area di ‘Little Caribbean’ ta subraya e conexion Caribense y regional cu e Reino Hulandes tin. Tambe ta un muestra con e paisnan den Reino Hulandes por uni pa explora oportunidadnan economico. E relacion fuerte cu Merca ta esencial pa e prosperidad di Reino Hulandes, y pa Aruba specifico como isla Caribense cu ta depende fuertemente riba e economia Norte Americano.
“E ta un honor pa por forma parti di e delegacion hunto cu Rey Willem- Alexander y Reina Máxima. Como minister semper mi ta buscando oportunidad pa desaroyo economico di Aruba”, minister Wever a menciona. E biahe aki ta ilustra e importancia y e contribucion valioso na e bon relacion y colaboracion dentro di Reino Hulandes y cu Merca.
