For di investigacion haci pa nos coresponsal Godfried Adem di e oficina di 24ora.com na Hulanda, ta indica cu den e investigacion policial na Corsou ta dunando un prome indicacion cu henter e asesinato tabata pornada. Mas bien e hobennan ladron a spanta y den nan nervio un di nan a los un tiro mortal riba Toon Brood, un oficial di Koninklijke Marechaussee staciona na Corsou.
Segun nos investigacion, parce cu den 11 minuut di tempo, manera e filmacion (beeldmateriaal) ta indica, nan a atraca, asesina y horta auto di e famia. Den e proceso a maltrata su señora y su yiu di a penas 12 aña di edad, cu pa colmo ta autista.
Fuentenan clave den e investigacion a sigura cu ta unicamente 300 florin y algun cen larga e atracadonan a logra horta den e cas situa den Reigerweg, na Corsou. Si nan a exigi placa y tambe e yabi di auto ora nan a bay cu e casa den camber di e victima. E criminalnan aki tin asina sanger friu cu e homber ta benta morto den cura patras y nan trankil paden ta purba horta su placa, auto y cualkier articulo di balor.
Echo ta cu a keda un rato den e cas buscando cos pa horta sin por a haya nada. Despues nan a bin topa cu un uniform colga den camber, nan a ripara te e ora numa cu ta un oficial di KMar nan a tira mata
Ta te na e momento ey nan a realisa cu nan a hinca nan curpa den un problema basta serio y a busca tur forma pa bandona e cas mas lihe posibel. A bay cu e auto di e victima y tres shen y pico florin cu nan a logra acumula durante e atraco mortal.
Te cu awo tin tres sospechoso deteni na Corsou. No por descarta cu lo por tin mas detencion ainda.
