Rond di 9:30 AM funcionarionan di husticia a tira un inval na e oficina di DIMAS, situa na Playa. DIMAS ta tende tur loke cu tin di haber cu permisologia, cu ta cay bou encargo di Minister Glenbert Croes.
Mientras cu polisnan a drenta a paden, a tuma contacto cu e mandatario, kende su unico reaccion tabata: “Nos ta laga e investigacion tuma su curso y mi ta verwacht tur hende coopera cu investigacion.” Ministerio Publico di nan banda a bisa “ainda nos no por bisa nada. Mas laat ta saca un comunicado di prensa”.
Segun por a compronde mas cu 10 funcionario di diferente departamento a drenta e oficina di DIMAS, compaña pa fiscal. Aunke cu paden tabatin cliente en espera, e servicio a paralisa pasobra a pidi tur trahado pa reuni riba cada piso cu nan ta traha pa permiti e funcionarionan busca e material cu nan a bini pa confisca.
A puntra p’e persona encarga cu IT, e sistema di computer. Pa basta tempo caba tabatin rumor cu lo tin un investigacion andando riba DIMAS. Aunke cu Kathy Paskel ta bek na trabou, ainda e Management Team ta den funcion.
