Awe a sali un post riba Facebook unda diferente persona a mustra nan indignacion pa cu falta di respet di algun bishitante na Kapel di Alto Vista.
Kapel di Alto Vista, e prome misa di Aruba, ta un di e luganan mas bishita door di e turistanan cu yega Aruba. No solamente esey pero tambe localnan.
Ya caba na diferente ocasion a denuncia un falta di respet cu entre otro negoshinan cu ta wordo haci dilanti e misa, no di materialnan religioso pero otro cosnan special dirigi na e bishitantenan di Aruba. Un persona no por a kere su wowonan ora cu un grupo di bishitante a yega y un di nan a cana drenta e kapel lomba sunu. Algo cu e lo no por haci den ningun cas religioso.
Mas indigna e ciudadano a bira ora cu el a tuma nota con un otro señora a cana drenta den e luga cu un boter di cerbes den man. Ta parce cu e hendenan ey no tin religion pasobra de lo contrario no a haci algo asina.
Lo ta bon pa trece un cambio inmediato pa pone un borchi bon grandi eynan cu e reglanan di kico no por y si ta posibel laga un persona para ey, algun biaha pa tene control. Pero tambe mester tuma contacto cu hotel y companianan di tour, of cu ta huur auto / quadracer of cualkier otro vehiculo, pa splica nan clientenan cu ora ta bay na un Iglesia, cu ta un sitio di atraccion, pa mustra e respet necesario.
Ta spera cu otro hendenan contribui tambe pa hala atencion di personanan cu no ta cumpli cu e reglanan di decencia pa cas di Dios.
