Despues cu sindicatonan di e funcionarionan publico a yega na un acuerdo cu Gobierno riba Indexering, e grupo di Gelijkgestelden a lanta para cu nan tambe mester bini un remarca pa indexering. Pero riba esaki no tin nada concreto ainda, segun Prome Minister mr. Evelyn Wever-Croes a bisa den e conferencia di prensa di gobierno dialuna mainta.
Entre otro tin sindicato SEPPA cu a manda un carta pa e mandatario pidiendo pa sinta na mesa y papia riba e tema di indexering pa “gelijkgestelden”. Esaki ta e grupo di trahadonan cu e trato cu nan ta ricibi ta igual na funcionario publico. Por ehempel, pa cierto fundacionnan cu ta haya subsidio di Gobierno.
A puntra Prome Minister con a para cu e tema aki. Algo riba cual e no tabata por a duna un contesta. Esaki pasobra “e tema ta den man di mi coleganan minister y mi no a haya update di nan ainda. E ta algo cu mi tin di bay follow up pa mira kico ta e decision cu nan a tuma. Mi sa cu nan a busca e consehonan y aworaki mi ta den nan man.”
No sa ainda for di cual post ta bay saca pa paga, si ta necesario, indexering na “Gelijkgestelden”. Si Minister di Finanza a bisa cu pa Parlamento a bay e nota di cambio pa presupuesto 2024 y durante su tratamento lo bay mira con ta bay atende cu e asunto di indexering.
