Diamars anochi tabatin e reapertura di e boutique di paña di e Iglesia Odres Nuevas. E locacion nobo tan a Acropolis Plaza, banda di e rotonde di Tanki Leendert. Na e ocasion a combersa cu pastoor di e iglesia, Roberto Gracias, kende a resalta e aspecto principal di e boutique, esta cu tur paña ta gratis. Pues esunnan den necesidad por pasa busca un paña libremente, pero tambe esunnan cu ta desea di haci un donacion, por hacie aki tambe.
“Tin paña casi nobo y den bon condicion y tin paña nobo di algun tienda cu a duna esaki,” asina e pastoor a splica. E ta habri tur dia, di dialuna pa diasabra, di 4’or di atardi pa 7’or di anochi. E pastoor ta haci un invitacion special pa e siman aki pasa busca loke tin mester. “Tin paña pa mucha muhe, pa mucha homber, pa hende hombre, hende muhe, hoben, etc.” Gracias a comenta.
E idea tras di e boutique a bin ya cu semper iglesia ta ricibi esunnan den hopi necesidad. Pa yuda nan a pidi e colaboracion di nan miembronan, y e contribucion tabata asina grandi, cu a dicidi di busca un luga apropia caminda por atende hend di iglesia y tambe cu no ta di e iglesia. Pa cu esaki, miembronan di e iglesia, esta pareha Santana, cu ta propietario di e centro comercial Acropolis, a facilita e local.
E iglesia tin mas di cinco aña ta regla paña y macutu di comestibel. E pandemia a pone nan explora algun idea cu a resulta den, por ehempel, e boutique aki. Mientras cu eynan tin paña so, na iglesia ta duna cuminda manera aros, bonchi, etc.
Gracias: “No mester tin miedo ni berguensa, por acerca akinan. Y si nan mes no tin un necesidad, pero nan conoce un hende, avisa e iglesia y nan ta atende cu esey. Si tin algun persona cu ta hay’e stroba pa bin e boutique, e iglesia ta bin cerca nan.” Pa mas informacion of donacion, e number di iglesia ta 593-9947 y 280-0230 cual ta accesibel den siman entre 9’or dia mainta y 1’or di atardi.
