Vocero di Ministerio Publico a nenga cu e noticia publica awe mainta den matutino Diario relaciona cu supuesto detencion den e caso di asesinato di Poentje Castro ta berdad. El a confirma cu e caso ta habri ainda si, pero no tin ningun detencion, ni na Aruba y ni na Boneiro. Di unda e noticia aki a sali nan no sa, pero ta lamenta si cu ta publica sin verifica, rebibando e dolor di famia innecesariamente.
John Anthony Castro ta naci dia 20 di october 1963 y tabata produci y presenta e programa “Un dia den bida” cu tabata pasa na Tele Aruba. Bisiñanan a conta cu entre 10or y 11or di anochi di diaranson dia 22 di december 2010, nan a scucha zonido di tiro, cu a zona manera klapchi. A tende zonido di un motorcycle pasando duro den bario.
Diahuebs mainta trempan, dia 23 di december 2010, bisiñanan mes a nota Poentje Castro benta na suela den su cura di cas, den un plas di sanger. A hay’e lomba sunu, bisti cu jeans y cu slof na pia. Investigacion a indica cu el a haya un tiro di cerca, den su frenta. Poentje tabatin 47 aña dia cu a mat’e.
Despues di e dia ey, a scucha di varios nomber cu lo por ta sospechoso den e caso di asesinato aki. Na varios ocasion Ministerio Publico a sigura cu e caso ta habri ainda y cu ta investigando pero cu no tin ningun sospechoso.
Mester menciona cu un aña prome, na november 2009, a cera Poentje Castro den un caso di ladronicia di un laptop di Claudius Philips. A acuse di “heling”. E mesun caso cu despues a haya un rabo masha largo mes y a causa mas detencion.
E “noticia” publica awe den e corant mas lesa na Aruba awor ta resulta di no ta berdad. Kico ta motibo di e publicacion no ta conoci. Diario pa hopi aña a domina na Aruba den noticia ora cu e tabata imprimi mas o menos 20 mil corant pa dia. Awendia ta imprimi solamente 7 mil corant, pero ainda ta esun mas lesa entre e medionan tradicional.
