For di momento cu Departamento di Mucha y Hoben (DMH) a keda oficialmente institui na october 2022, e trabounan relaciona cu ehecucion di ley di centro di cuido di mucha ta canando. Como un di e tareanan principal di DMH ta, ehecuta y supervisa ley di Centro di Cuido di Mucha y percura pa un bon calidad di cuido di mucha na tur e centronan di cuido di mucha na Aruba. Tur centro di cuido di mucha mester ta registra oficialmente na DMH, y tur mayor tin acceso tambe pa wak si nan centro di cuido di mucha ta registra via www.dmh.aw y bay na e tab di registracion nacional. Awe oficialmente DMH a sali den compania di Polis di Bario, cu e supervision y control den e centronan di cuido di mucha.
Pakico supervision den centro di cuido di mucha?
DMH ta haci supervision y control den centro di cuido di mucha pa garantisa un desaroyo completo y di siguridad y proteccion pa nos muchanan. P’esey un supervision apropia y profesional di e centronan di cuido di mucha ta sumamente esencial. Tanto e doño (propietario) di e centro di cuido di mucha y gobierno ta contribui hunto pa yega na un bon calidad di cuido di e centronan di cuido di mucha.
Doño (propietario) di e centro di cuido di mucha ta responsabel pa cumpli cu e rekisitonan di calidad di cuido di mucha, stipula den articulo 9 y 10 di e Ordenansa Nacional (AB. 2017 No. 38), cu ta indica cu mester duna cuido di mucha na un manera responsabel y profesional. E supervision ta sosode den un forma sin previo aviso y mester haci minimo 1 supervision pa aña, manera cu e ley ta stipula. Sinembargo e maneho di keho ta duna espacio, pa supervision tuma lugar na momento cu ta necesario, specialmente pa garantisa siguridad di calidad di cuido di nos muchanan.
Kico e supervision ta encera?
DMH ta haci un supervision cu ta consisti di observa, monitoria, prueba, acumula y evalua e servicio brinda y con ta anda cu e muchanan cu ta bishita e centro di cuido di mucha. Lo brinda un supervision stimulante, pa duna instruccion unda e centro di cuido di mucha mester traha riba dje, p’e cumpli cu e exigencianan di regulacion. Pues ta enfoca riba si e centro di cuido di mucha ta:
- brinda cuido y guia na e muchanan na un manera responsabel y adecuado;
- contribui na e desaroyo optimal y saludabel di e muchanan;
- percura cu e cuido di e mucha ta den un ambiente ‘safe’ (veilig) pa tur su muchanan;
- percura cu e centro di cuido di mucha ta cumpli cu e exigencianan di e manual di regulacion.
Sticker pa identifica cumplimento
DMH tin como meta final den futuro cercano, cu na momento cu un centro di cuido di mucha ta cumpli cu e exigencianan di regulacion pa opera, e centro di cuido di mucha lo haya un sticker visibel pa tur mayor. Un version relevante di e rapportnan di supervision tambe lo ta disponibel, pa asina e mayornan por informa nan mes debidamente tocante resultado di e supervision- y controlnan haci na e centronan di cuido di mucha di nan escogo.
