Specialmente p’e weekend di Dia di Mama, den Seaport Convention Center a tuma luga un show di kita sombre.
E show a conta cu presentacion di Tony Sherman, Izaline Calister acompaña pa Kris Kross y su banda.
Tony Sherman no ta un cantante desconoci na Aruba y su bos inigualabel semper a sa di cautiva su audiencia. En principio, Tony lo mester a presenta den un otro evento, cual no a bay door y pa cual Tony a bay forma parti di e show di Dia di Mama. Y e tabata sumamente contento di por ta bek riba nos isla.
Rib’e anochi aki, Tony a sinti e cariño di e publico Rubiano, cu a biba cu cada un di su cancionnan y esey ta loke un artista ta biba p’e: E calor di e publico cu ta biba cu cada un di su cancion- y presentacionnan. A pesar di tin un carera di varios decada, Tony ta bisa cu t’e publico ta loke ta haci un cantante grandi.
E anochi aki a conta tambe cu e presentacion di Izalyne Calister. El a bisa cu tabata e prome biaha cu el a sinti cu e tabata na Aruba pa trabou, pero ta como sifuera ta cu vakantie e ta. Loke a haci e weekend mas special, ademas di tabata Dia di Mama, t’e echo cu su famia tambe a bin cu ne e biaha aki. Y e hotel unda el a keda tabat hopi cerca di unda e concierto a tuma luga.
Pa loke ta e concierto mes, door cu tur cos a flui di un pa otro, e tabata por a echt relaha su mas y enfoca riba pa duna e publico loke nan tabata spera di dje.
Su repertorio tabata consisti di cancionnan nobo, pero tambe algun cancion conoci caba y cual e sa cu e publico ta spera di dje cu e lo canta nan.
Durante e concierto, Izaline a tuma un momento pa honra recuerdo di e mamanan cu no ta meymey di nos mas y el a haci esaki pa medio di e cancion di Kris Kross, ‘Andicuri’.
Sigur un anochi cu el a disfruta di dje, dunando tur di dje p’asina deleita e mamanan tur riba nan dia. Tambe el a duna un atencion extra special n’esunnan cu no ta mama, pero cu ta e persona cu ta cuida di nos yiunan ora cu e mamanan ta traha, sea ta un tanta of wela, un ruman. Nan no ta mama biologico, pero ta mama di curason.
E anochi aki, e cantantenan tabata acompaña pa Kriss Kross y su banda. Pa a acompaña dos grandi di musica, manera t’e caso di Izaline Calister y Tony Sherman, no tabata facil. Sigur un reto, cual el a acepta gustosamente.
No tabata prome biaha cu nan a acompaña Tony of Izaline, pero como director musical di e banda, sigur ta un satisfaccion grandi pa a wak con tur cos a cana netjes y miho di loke nan mes a spera.
Tabatin algun cancion di Tony Sherman cu nan no a train. Pero manera Kris Kross ta bisa, mayoria di nos a lanta ta scucha e cancionnan di Tony Sherman, cual sigur tabata un punto na nan fabor.
Un anochi cu a resulta den un exito rotundo.
