Hunga Teca a organisa “Puppy Love”. Esaki ta un tayer caminda lo concentra riba con un puppy den un famia ta ofrece amor, pero tambe crecemento fisico y motorico na un mucha. Tambe ta demonstra con pa duna amor y tin pasenshi cu un puppy. Mescos cu un mucha y adulto ta desea amor, mescos ta conta pa un puppy.
Shurman Milliard, di Hunga Teca, a duna di conoce cu diasabra tabatin dos actividad. Un di e actividadnan aki ta “Puppy Love”. Nan a organisa e actividad aki conhuntamente cu Luna Foundation. Durante e actividad aki Luna Foundation a bay cu varios puppy pa asina e muchanan sa con pa duna nan amor y cariño. Tambe e muchanan por a siña con pa cuida e bestia. Ademas e muchanan por a siña con pa traha amistad y con pa anda cu otro persona.
Den e proyecto aki, segun Shurman Milliard, kier ilustra cu nos ta un comunidad cu ta cuida cacho y cu mester sa mas di cacho. Hunga Teca ta sumamente contento di por a traha cu Luna Foundation durante e proyecto aki.
Zoraida Conijn, fundado di Luna Foundation, a duna di conoce cu Hunga Teca ta siña e muchanan con pa tin aprecio pa otro. Luna Foundation a uni su mes na Hunga Teca pa siña e muchanan con pa atende cu nan mascota. Alabes a siña e muchanan cu nan mester tin respet pa tur otro bida.
Tin mucha cu tabatin miedo y no por a compronde locual e bestia mester. Un mucha tabatin miedo y na final a gara un y a sinta cu ne. Esey ta demostra cu e evento tabata exitoso. Pa adopta un cacho ta costa 250 florin. Tur cacho ta crioyo. E 250 florin ta encera cu e cacho ta opera y vacuna.
