Den 2023 gabinete ta pone 16 miyon euro disponibel pa mehora forsa di compra pa e habitantenan di Boneiro, Sint Eustatius y Saba. Den 2024 despues ta pone 12 miyon euro extra disponibel y for di 2024 4 miyon euro pa aña. E placa ta forma parti di e medidanan amplio cu ta tuma pa mehora forsa di compra na Hulanda.
E fortificacion di forsa di compra aki ta bin riba e medionan financiero extra di 30 miyon euro structural (23 miyon euro den 2022) di den e Acuerdo di Coalicion pa mehora nivel di bida di habitantenan di Hulanda Caribense. Y ta un complementacion riba e 5 miyon euro cu gabinete a pone na disposicion na maart ultimo pa reduci accijns y introduci un compensacion energetico pa cas di famia cu un entrada abou den 2022.
Ta uza e montante extra cu gabinete ta pone na disposicion awor pa por pone e compensacion energetico disponibel den 2023 tambe. Ta trata di un suma di 1300 dollar pa cas di famia te 130% di e sueldo minimo legal. Tambe ta prolonga e reduccion di accijns riba gasolin den 2023: 16 USD cen pa liter pa e prome mita di 2023 y 8 USD cen pa liter pa e di dos mita di 2023.
Ademas e grandinan ta ricibi un pensioen basico mas halto den 2023. E aumento di e AOV ta coresponde cu e suma cu originalmente tabata desea pa 2025. Esaki ta nifica cu un persona cu tin derecho riba AOV y cu tin AOV completo acumula, dependiendo di unda e ta biba na Hulanda Caribense, ta ricibi pa luna alrededor di 150 dollar extra.
Mas aleu e mayornan ta ricibi otro aña mas compensacion pa yiu y acogida di mucha ta bira mas barata. Esaki ta nifica pa un mama soltero cu 2 yiu di por ehempel 1 y 3 aña, cu e ta ricibi 40 dollar extra na compensacion pa yiu y ta paga 50 dollar menos na acogida di mucha (den caso di acogida completo).
Tambe ta hisa e suma liber di impuesto. Esaki ta parti di e entrada pa cua no mester paga belasting. E aumento di e suma liber di impuesto na Hulanda Caribense cu 500 dollar ta conduci na un reduccion di gasto di 30,4% x USD 500 = alrededor di 150 dollar riba base anual pa e habitantenan di Hulanda Caribense cu ta paga impuesto di sueldo of entrada.
E medidanan di forsa di compra ta bin extra riba e coreccion di inflacion cu ta aplica generalmente entrante prome di januari riba e sueldo minimo legal, e AOV, e AWW, e onderstand y e compensacion pa yiu (como tambe e suma liber di impuesto). Ta stipula altura di e coreccion di inflacion basa riba e indice di prijs di consumido di CBS pa e di tres kwartaal di 2022. Ta publica e porcentahe aki den careda di 20 di october. E porcentahe di inflacion pa e di dos kwartaal 2022 tabata alrededor di 8 pa 9%, pero ta dificil pa pronostica con desaroyo di esaki lo ta pa fin di e di tres kwartaal di e aña aki.
Mas aleu ta trahando tambe riba un pakete pa Hulanda Caribense pa suavisa e consecuencianan di e prijsnan energetico cu ta aumentando.
Minister Schouten di Maneho di Pobresa ta mira cu, debi na e subida fuerte di prijs di energia y alimento, siguridad di existencia di un grupo creciente di hende ta mas y mas bou di presion: “Pa e motibo ey nos ta tuma un gran cantidad di medida pa mehora forsa di compra otro aña, manera un compensacion energetico nobo pa e entradanan abou, un pensioen basico mas halto y pa e mayornan, un compensacion pa yiu mas halto y acogida di mucha mas barata. Ta necesario pa e entrada- y gastonan ta mas den balans cu otro. Gabinete kier tuma e medidanan pa logra esaki mas rapido.”
Secretario di Estado Alexandra van Huffelen di Relacionnan den Reino ta contento cu e placa extra pa e habitantenan na Boneiro, Sint Eustatius y Saba: “Ta importante pa nos yuda tur habitante di Hulanda cu e medidanan di forsa di compra extra. Mi ta contento cu pa Hulanda Caribense tambe tin un bon pakete. Pero mi sa tambe: nos no a yega ainda. Nos mester sigui traha riba combatimento di pobresa.”
