Durante di apertura di IPKO, lider di fraccion MEP a bay riba e parti di kwijtschelding. E ta bolbe pidi pa duna Aruba kwijtschelding, pero Paul Rosenmöller a recorda un y tur cu Hulanda no ta duna placa gratis.
Shailiny Tromp-Lee, lider di fraccion MEP, a indica cu dia 21 di mei 2022 Parlamento di Aruba a manda Hulanda un verslag riba RAft y te fecha di awe no a haya un contesta. E combersacionnan ta sigui manera tin un proceso nobo di RAft a cuminsa. El a pidi pa via e plataforma di IPKO pa haya un contesta riba e verslag cu nan a manda en conexion cu RAft.
El a indica cu Aruba tabata tin e speransa cu Hulanda tabata por a duna Aruba un interes abou y pa paga un tempo largo. Esey ta e tipo di ayudo cu a spera di haya.
“Mi a spera cu Hulanda mira awo e oportunidad di harmonisa e supervision di financia pa tur isla di Reino Hulandes. Esaki lo ta acompaña cu e conoci condicionnan manera kwijtschelding/saneamento parcial di e debe”, el a indica.
Paul Rosenmöller, miembro di Eerste Kamer (Groen Links), a reacciona riba loke Tromp-Lee a bisa. El a indica cu esey tabata un periodo manera ta bisa e tempo di duna placa gratis a pasa. Esaki ta conta tambe ora ta trata di e temanan di e paisnan cu tin di haber cu e politica Hulandes of gobierno.
A biba den un periodo largo unda cu e interes tabata cero. Pero den periodo dificil, manera esun di Covid-19, a sostene e ciudadanonan cu biyones, di cual tambe a duna sosten na esunnan di e islanan Caribe Hulandes.
