Diamars a tuma luga e wega decisivo di e seleccion Hulandes cu a hunga su clasificacion pa e siguiente ronda di e Eurocup 2024. Ambiente tabata grandi na Aruba. E fanaticada Hulandes ta grandi y esey tabata por a wak tambe na Cafe the Plaza, Moomba Beach y tambe na Gloria.
Aki ta unda cu tin un pantaya grandi pa wak e diferente weganan deportivo. E pantaya di mas grandi cu tin na Aruba y naturalmente hopi hende a probecha pa wak e wega eynan. Hulanda a hunga un di su miho weganan y no a duna Rumania un chens pa yega cerca, cu excepcion cu aki aya nan tabata presiona.
Varios di e comentarionan tabata indica cu porfin Hulanda a hunga e wega cu tanto ta custumbra cu ne. Asina tambe e ekipo di e director tecnico, Ronald Koeman a registra un victoria contundente di 3-0 riba Rumania y ta clasifica p’e siguiente ronda.
Nan siguiente rival lo ta e ganado di e wega entre Austria y Turkia, cual wega ta tuma luga awo, diamars, 9:00pm na Leipzig, Alemania.
Hulanda a gana cu golnan di Cody Gakpo y Donyell Malen (2). Gapko ta cu tres hit comparti y ta e hungado cu mas gol anota di Eurocup 2024.
Pa e seleccion Hulandes, esaki ta su prome pase pa kwartfinal desde Eurocup 2008. For di 2012 bin ariba, Oranje a perde tur nan weganan di grupo, na 2016 e seleccion Hulandes no a clasifica pa Eurocopa y na 2021 nan a yega te na octavo di final.
Awe nochi e ambiente ta sigui ora cu tin otro wega importante cu un fanaticada grandi aki na Aruba. Ta trata di e wega unda e diferente biaha campeon di mundo Brazil ta enfrenta e seleccion den curason di hopi na Aruba, esta Colombia.
Sizzle tin su porta habri pa esnan cu kier mira e wega awe nochi den gran ambiente. Pa cada gol cu anota awe nochi, Sizzle ta regala un bebida.
