Riba dia di eleccion, esta 25 di juni 2021, corte a trata e caso pero recientemente a dicta sentencia den caso di e mucha di inicialnan L.M. di apenas 15 aña di edad, acusa di a hinca Rudolf Ras mata net na cambio aña.
E CASO
E caso a tuma luga na un fiesta y aki ta caminda cu tabatin un discusion, cu a bay for di man. Dado momento e hoben a saca un cuchiu y hinca e victima un solo biaha den su pecho. E hinca tabata asina profundo cu el a yega na curason di e homber cu consecuencia fatal. E asesino ta primo di e pareha di Rudy Ras, pues ta den famia mes.
SENTENCIA
Recientemente hues a dicta sentencia den e caso aki. A condena e mucha di inicial M. na 12 luna di prizon di cual 4 luna ta condicional. Mester menciona cu ley ta permiti un castigo maximo di 12 luna so, ora cu ta trata di un mucha comp acusado. Sinembargo den e sentencia a inclui un tempo di prueba di 2 aña, den cual e lo mester keda bou guia di Reclassering. Tambe e mucha, of su mayornan, mester paga famia di e victima e suma di 5200 florin na gastonan di entiero.
Mirando cu e mucha ta deteni desde januari 2021 y kitando e tempo di “bon conducta”, ta haci cu dentro di algun siman mas e mucha lo ta liber atrobe.
