Esaki ta loke cu Hues di Corte di Prome Instancia di Sint Maarten a bisa e fundacion Stichting Pro Soualiga, cu a pidi pa prohibi Hulanda di bini cu e organo di reforma pa e isla. Hues a bisa nan cu un intervencion asina ta cay pafo di nan tareanan di un hues.
E fundacion a cuminsa e caso contra pais Hulanda y Sint Maarten (Minister encarga cu asuntonan general). E pandemia a trece cu ne hopi problema y crisis profundo cu a afecta e islanan di Caribe Hulandes tambe. E paisnan aki, ta para den e sentencia, a pidi Hulanda pa apoyo. Den carta di 10 di juli 2020 na Tweede Kamer Secretario di Estado Raymond Knops ta informa nan cu Gabinete ta dispuesto pa brinda apoyo financiero y ayudo humanitario.
Y el a bisa cu Hulanda a pone pa esaki 41.2 miyon euro na ayudo humanitario como un regalo sin ningun condicion. Na mesun momento cu Hulanda a crea un sistema di tranche cu condicionnan pa apoyo di likides. Pero Hulanda a bisa cu si pa e proximo añanan ta bay para garantia pa hopi placa cu e islanan mester, nan kier tin e siguransa cu ta uza e placa debidamente y cu por paga bek. Pero e pakete cu e condicionnan presenta dia 10 di juli ni Sint Maarten ni Corsou no a acepta. Hulanda kier un Rijkswet di un Caribisch Hervormingsentiteit pa e islanan. Esaki ta loke cu e fundacion di Sint Maarten no ta di acuerdo cu ne.
Nan ta pidi pa para e decolisacion. A pidi estado Hulanda pa pone un paro na e concepto di Rijkswet en cuestion. Como cu esey no a sosode, e stichting a dicidi di bay Corte. Estado Hulandes di su banda a bisa cu e demanda di e fundacion ta inadmisibel pasobra nan no tin interes propio den e asunto aki y nan no por papia di un accion colectivo. E fundacion no a presenta su statuutnan den e caso y no por a mira cual ta su metanan. Banda di esaki, nan ta bisa cu e fundacion no a mustra cu nan a haci suficiente intento pa papia cu Estado riba e asunto.
A manda carta pero no a duna suficiente tempo pa reacciona Tambe a menciona cu di tur manera nan demanda ta wordo declara inadmisibel pa motibo di e falta di urgencia den nan demanda. E fundacion a bisa cu si tin urgencia pa motibo cu Hulanda ta na punto pa bini cu e Rijkswet, pero niun caminda Corte por a tuma nota di esaki. Hues ta mustra cu e ta un consensus rijkswet y den casonan asina tur e paisnan mester bay di acuerdo. Mirando cu ainda no a bay di acuerdo, e demanda no ta urgente, na opinion di Corte.
Hues a bisa cu si nan por a conclui mes cu e caso ta uno urgente, no por a bay di acuerdo cu nan demanda tampoco.
Ta papia aki cu e Stichtinf ta pidi Corte prohibi Estado (Hulanda) bini cu e proposicion concepto di e Rijkswet. Esaki ta bay contra di e tarea di e hues. nEstado a bisa, y asina e ta, cu Rijkswetten ta wordo fiha door di Gobierno di Reino y Staten General, y ki ora ta bini cu un Rijkswet of no, ta algo cu mester husga a base di cada decision politico y interes di esnan envolvi. Hues no por interveni den e procedura di tumamento di un decision politico. Y den un consensus Rijkswet, tur e paisnan participante mester bay di acuerdo cu e proposicion di ley, pues tambe e Gobiernonan di e paisnan mester duna nan aprobacion, evaluando e contenido. Den esaki un hues no por interveni.
