Despues di un investigacion riguroso di varios luna, dirigi riba ‘afpersing’ (blackmail) y participacion den un organisacion criminal, a logra cay riba e grupo aki.
Recherche di Santa Cruz (DAR-4), den colaboracion cu fiscal di Ministerio Publico y Hues Comisario, Bureau Financiele Onderzoeken di KPA (BFO) y Digitale Recherche di KPA, a realisa dia 2 y 3 di maart 2023, cuater detencion y a haci un entrada hudicial na cuater adres.
Durante e accion aki a detene e siguiente sospechosonan: Un hende muhe di inicial A.M.T.M. naci na Republica Dominicana, homber di inicial D.J.L.K. naci na Aruba, un otro hende muhe di inicial Z.A.R.A. naci na Venezuela y e di dos hende homber di inicial A.R.G. naci na Aruba.
E grupo aki supuestamente tabata acerca nan victimanan cu insinuacion di gusta of conoce nan miho, pa despues pidi video of potret comprometedor/ di parti intimo of sunu di parti cada victima.
![](https://24ora.com/wp-content/uploads/2023/03/WhatsApp-Image-2023-03-03-at-4.52.53-PM.jpeg)
Unabes cu nan a graba e victimanan ‘den accion’, nan ta menasa e victima di publica e grabacion riba red social si nan no paga.
Un cantidad relativamente grandi di victima ta identifica y miles di florin tabata paga, pa evita cu video of potret comprometedor/ bergonsoso bay publica riba social media.
Durante e ultimo entrada hudicial e bin encontra tambe, un cantidad basta grandi di placa na efectivo. A detene un otro homber di inicialnan D.E.S.M. naci na Venezuela pa labamento di placa.
E investigacion ta continua y no por descarta cu mas detencion lo tuma luga. KPA y OM ta pidi comunidad pa no cay den e weganan aki di tentacion, cu por conduci na ‘sexting’, pasobra bo tambe por bira victima. Evita berguensa y perdida di placa y no cay den e trampanan aki.