Den un esfuerso pa mehora e siguridad riba caminda y reduci iincidente relaciona cu consumo di alcohol, Cuerpo Policial a tene un operativo extenso di control den trafico.
E proyecto aki a enfoca mayor parti den cercania di e clubnan nocturno rond di e isla, for di punta pariba te punta pabao, unda cu a realisa inspeccion extenso riba diferente vehiculo.
Durante e operacion polis a logra detene mas di 10 persona cu tabata core auto bao influencia di alcohol.
E operacion di control no tabata exclui di incidente. Durante un momento di e control, un di e vehiculonan a hera dal un polis, pa despues huy di e luga durante e proceso na altura di Drive-Inn, loke a provoca e intervencion rapido di e agentenan. Pero lastimamente no a logra detene e chauffeur aki, kende a baha na catuna.
A pesar di e retonan aki, e unidad motorisa di polis a hunta un papel crucial den e exito di e operacion. Su reaccion rapido y habilidad pa maneha situacion dificil a sigura cu e proceso di control tuma luga di manera eficiente y ordena. E unidad motorisa a destaca riba e importancia di e controlnan aki y a reafirma nan compromiso pa mantene e siguridad riba caminda publico, specialmente den e zona a di actividad nocturno.
E operativo aki no solamente ta subraya e dedicacion di Cuerpo Policial den e lucha contra coremento di auto bao di e efectonan di alcohol, sino tambe e necesidad cu e chauffeurnan ta mas responsabel y consciente di e peligernan cu alcohol ora ta tra’i stuur. Autoridad ta sigui implementa e tipo di medidanan aki pa garantisa e siguridad di tur e ciudadanonan riba caminda.
