Tabata algo prome cu 1or di marduga, ora cu Polis a topa cu un Nissan Color shinishi coriendo den e area di WEB na Balashi. E chauffeur masculino no por a demostra ni argumenta un motibo valido dicon e ta ariba caya marduga mientras tin TdQ, Polis a bay over mesora na detencion. Mirando cu CEA no Tabata riba caya, e transportacion di e detenido a tarda un poco mas cu normal. Despues di basta rato un transporte policial di e distrito di San Nicolas a bin busca e homber y hib’e Warda di Polis caminda cu e proceso di multa lo tuma lugar. Mil florin di multa sigur lo ta duro den e epoca cu nos ta bibando aden na e momentonan aki. E homber mescos cu tur e otronan cu e keda deteni durante Toque de Queda y tin dos siman di tempo pa paga e multa aki of binti dia tras di trali na Santo di Patia, KIA.
