E tabata e homber cu e edad mas avansa na Aruba. Na luna di mei ultimo el a cumpli 105 aña y bon bon na tino, hunando ahedres! Frans Croes a fayece dialuna merdia, despues cu su curason a cuminsa bira suak. E no a sufri, sino a muri den tur trankilidad y rondona pa hopi amor di su famia.
Frans Croes a haya e titulo di e homber cu e edad mas avansa di nos isla despues cu James Cornelius Jacobus Williams di 107 aña di edad, a fayece. El a fayece den su soño algun luna pasa na su cas mes, situa na Macapruimstraat 3 na Dakota.
Persona cu edad mas halto na Aruba ta un hende muhe
Despues di morto di James Williams, mesora e persona cu e edad mas halto riba nos isla ta Helen John, biba na San Nicolas. E tin 107 aña di edad.
Tocante Frans Croes
Riba dia 10 di mei ultimo, Frans Croes a cumpli 105 añ di edad. Y cu e edad respeta ey ainda e ta hunga ajedrez tur dia! El a stuur auto te cu su 100 aña di edad. Frans Croes ta tata di, entre otro e docente di musica Maybelline Arends-Croes y Sandra Croes, hopi conoci den mundo di deporte. Frans Croes mes ta conoci como propietario di e agencia di productonan di beyesa, Fa Croes NV.
Frans Croes ta yiu di Jan Laurens y Dorilia Croes, e mayo di 4 yiu y e unico yiu homber. E mes a haya 6 yiu di cual Maybelline ta esun mayo. El a cuminsa traha den gobierno y despues a bay traha na Lago. Pero cu tempo el a opta pa toch bolbe traha pa Gobierno te ora cu el a cumpli 50 aña y a baha cu pensioen adelanta. Aki el a habri e agencia Fa Croes NV, y a basa su mes riba producto y meubulario di beyesa, ya cu su casa, Aura Croes (qepd) tabatin su mesun kapsalon pa mas di 40 aña. Señora Aura a fayece 4 aña pasa.
Varios habitante riba 100 aña na Aruba
Mester menciona cu tin un lista di ciudadanonan di edad avansa riba nos isla, pues cu a surpasa 100 aña y tin un lista cu lo cumpli e bunita edad ey e aña aki ainda! Estadistica ta bisa cu tin 10 habitante riba 100 aña na bida riba nos isla. Di e dies ciudadanonan aki, 6 ta hende muhe y 4 hende homber. Si Dios duna nan bida y salud, e aña aki lo tin ocho (8) ciudadano mas cu lo cumpi 100 aña y asina join e club di centenarionan.
Record: Habitante cu a biba mas na Aruba
Mary Louisa Benjamin a nace dia 14-07-1910 y a fayece na Aruba dia 01-11- 2021 na e bunita edad di 111 aña. Ningun hende den historia di nos pais a yega di alcansa un edad asina halto. Mary a nace na Sint Kitts pero a biba mayoria di su bida na Aruba. E tabata completamente na su tino y tabata move independiente te na su 111 aña di edad. E tabata bibando cu su unico yiu na bida, esta Joseph Henderson den De La Sallestraat. Prome cu ne tabata Maria “Mai” Maduro cu a fayece cu 109 aña di edad.
Kico ta un centenario?
Un centenario ta un persona cu a alcansa of pasa e marca di 100 aña di edad. Como cu expectativa di bida mundialmente ta hopi bou di 100 aña, ta haci cu ciudadanonan cu yega e edad ey ta considera di a biba bon y como tal a biba largo. Na aña 2012, Nacionnan Uni a estima cu tabatin 316.600 persona na mundo cu 100 aña di edad of mas. Ta bon pa añadi cu rond mundo expectativa di bida ta subiendo debi na miho cuido medico. Na Inglatera por ehempel nan ta calcula cu un tercera parti di babynan cu a nace na aña 2013 lo biba pa por lo menos 100 aña largo!
Na Hapon nan ta biba largo
Actualmente Hapon tin e cantidad mas grandi di centenarionan na mundo, compara cu tur otro nacion. Den nan Censo di aña 2017 a conclui cu nan so tin 67.824 ciudadano cu tin 100 aña of mas. Proporcionalmente tambe nan tin mas, pues 34,85 ciudadano riba 100 aña pa cada 100.000 habitante den e pais. Hapon a cuminsa administra su ciudadanonan di 100 aña desde aña 1963 caba, ora nan tabatin 153 ciudadano so cu e edad ey. Na aña 1998 nan a surpasa 10.000 habitante, na aña 2003 a pasa 20.000 y na aña 2009 a pasa 40.000! Nacionnan Uni ta estima cu na aña 2050, Hapon lo tin 272.000 habitante di 100 aña of mas.
Record mundial actual
E persona cu edad mas avansa na mundo ta señora Maria Branyas, naci na Spaña, cu 116 aña di bida. E record di e hende muhe cu a yega di biba mas na mundo ta Sarah Knauss di Merca (1880–1999) cu a biba te cu 119 aña y 97 dia. E homber mas bieu na mundo awe ta Juan Vicente Perez di 114 aña di edad, naci na Venezuela. E homber cu a record den “biba mas” ta Jiroemon Kimura (1897–2013) tambe di Hapon, cu a biba 116 aña y 54 dia.
Hende muhe ta biba mas
Mescos cu na Aruba, cu mayoria di esunnan riba 100 aña ta hende muhe, na Hapon e cifranan ta mas alentador. Na aña 2016, Hapon tabatin 57.525 hende muhe di 100 aña of mas mientras cu e cantidad bou di e hende hombernan tabata apenas 8.167, pues un ratio di 7:1. Esey cu awo el a baha poco, pasobra un tempo e ratio tabata di 11.6:1.
Expectativa di bida na Aruba
Na Aruba, di acuerdo cu cifranan oficial, e edad promedio di fayecimento general ta di 79.1 aña. E expectativa di biba pa hende homber ta 77.2 aña y 80.6 aña bou di hende muhe. E expectativa aki a subi e ultimo decadanan aki, debi na mas y miho cuido medico y opcion pa biba mas largo compara cu antes.
