Siman a habri y polis ta sigui move activo riba caya. Un rato pasa alrededor di 9:15 pm un patruya di polis a para un auto marca Hyundai modelo Accent net dilanti di Cas di Partido AVP den Koningstraat.
A par’e p’un control rutinario, cu a resulta bon p’e agentenan. E chauffeur di e Accent no por a demonstra un identificacion valido y tabata hopi nervioso durante e control. Pa cuminsa, stuurment’i auto sin rijbewijs ta garantisa bo un trip gratis pa warda di polis.
Pero den e caso aki, no solamente no tabatin un rijbewijs, sino cu no tabatin ni un ID valido. E agentenan ta sospecha cu e homber no tin permiso di estadia pa ta riba nos isla. Pa mas investigacion, a deten’e y transport’e pa ward’i polis caminda e proceso di interogacion lo tuma luga.
