Diabierna den careda di 5:00 pm riba e Green Corridor un auto pickup blanco a dal den un Nissan March preto. Consecuentemente e chauffeur a perde control y dal den e muraya chikito memey di e dos caminda. Pero chauffeur di e pickup blanco a sigui su caminda.
Chauffeur femenino di e Nissan March a sigui core, pero na yegada di rotonde di Pos Chikito, e no tabata por mas pa motibo di dolornan. Polis a presenta na e sitio pa haya informacion di loke a pasa. Un otro automobilista a bay tras di e pickup pa purba haya number y model, pa duna polis. Ambulance a presenta na e sitio y di biaha a cuminsa controla, pero no tabata necesario pa hib’e hospital.
Den area di Ponton a para un pickup cu e descripcion duna y na yegada di polis cu e muhe accidenta, a ripara cu esaki no tabata e auto cu a dal den dje. Polisnan no por a haya ningun marca di golpi cu ta cuadra cu e daño riba e Nissan March. Polis a laga e chauffeur di e pickup sigui su caminda. E caso aki tin e atencion di polis y lo sigui investiga cua pickup blanco a dal den e Nissan March preto.
