Herrick Henriquez, director di ATIA a destaca e importante avancenan logra den e reunionnan cu ta tumando luga na Surnam, enfoca pa mehora e interconectividad comercial entre e islanan di Caribe y e region.
“Awe tabata un dia hopi productivo y importante. Nos a reuni cu VSA Holding y CMA y nos por a dialoga directamente cu nan. Ambos compania, un mas enfoca den transporte di bulk y e otro den servicio personalisa, a mustra interes den establece conexion cu nos. E colaboracion por ta hopi beneficioso,” Henriquez a comenta.
Nan tabatin e honor tambe pa reuni cu e CEO di VSA Holding, Patrick Haley. Su empresa ta opera na nivel global y ta ofrece un variedad amplio di servicio logistico y di real estate. Ta un compania integral pa solucion logistico, Un di e cosnan mas interesante cu a discuti ta e posibilidad di consolida container na Surnam. Aunke esaki ta presenta reto, Surnam ta habri n’e idea y ya tin presencia na Aruba.
E intercambio di informacion y contacto ta crucial pa fomenta comercio na Aruba, specialmente p’e miembronan di ATIA y e otro comerciantenan cu m,ester e servicionan aki. Establece y mantene e conexionnan aki por amplia e oportunidadnan comercial na Aruba, Henriquez a enfatisa.
Henriquez a reconoce cu, aunke Surnam por parce mas leu compara cu otro pais di e region manera Colombia, e costo di e productonan y e ruta logistico ta haci cu e opcion aki ta cada biaha mas atractivo.
Henriquez: “Surnam tabata un socio comercial di Aruba durante hopi aña y ya tin empresa Arubiano cu ta traha cu nan. E problema principal semper tabata e tempo di entrega. Awe, un di e empresanan a menciona un tempo di entre 20 pa 28 dia. E escala economico di Arubano semper ta permiti un fluho constante di container, loke ta nifica cu tin biaha mester pasa via Jamaica pa consolida e entrega.
Sinembargo tin producto hopi interesante na Surnam, manera cabaron, pisca y palo, cu por ta importa den gran cantidad. Aunke algun comerciante mas chikito ainda no por maneha e volumen aki, mientras cu nan negoshi ta crece, nan por probecha e oportunidadnan aki.
E clave ta den e bon planificacion pa haya producto di calidad halto y na prijs competitivo pa Aruba.
E desaroyo aki ta priminti mehora e relacionnan comercial entre Aruba y Surnam, habriendo posibilidad nobo pa e comerciantenan Arubiano y fortaleciendo e economia local.
