Desde cu dump a cera, por anota cu na 2023 a bin topa cu hopi sushi rond di nos isla. A cera e dump di Parkietenbos pa motibo cu e habitantenan tabata keha di e holo, molester, pero tambe e mahos bista cu e ta mustra. Gobierno a bin c’un plan, unda cada desperdicio ta bay un caminda y mester paga pa nan.
Aunke tin ta cumpli, hopi no. Esey a pone cu na diferente parti a bin topa cu dump ilegal. Desde hopi tempo caba hende ta tira sushi rond di nos isla, pero awo ta di mas. Diamars un persona tabata pasando riba e caminda di Juanamortostraat. Aki el a topa c’un bista mahos. A bin topa cu cantidad di sushi den Juanamortostraat, direccion pa Pepsi Cola Veld na San Nicolas.
E persona aki no por a kere su wowonan na momento cu el a mira e cantidad di sushi. E caminda aki ta uno hopi frecuenta pa turista. Awo e ta un mahos bista, mirando e cantidad di sushi cu tin ey tras.
Sinembargo, no ta prome bes cu ta topa cu cantidad di sushi eynan. Hopi biaha hende ta pasa y tira desperdicio. Pero, awo e situacion a bira uno pio y e area aki a bira un dump completo, uno cu ta ilegal.
Ta pidi pa e departamentonan concerni atende cu e situacion aki. Ken ta esun cu ta haci esey, no ta conoci. Manera e habitantenan di Parkietenbos no kier pa tin un dump cerca di nan, den e area aki di San Nicolas e dump ilegal no ta aceptabel. Tin cu busca un solucion p’e asunto aki.
