Dios no a duna nos un Spirito di miedo, tampoco nos mester ta hende cobarde, pasobra mas grandi ta esun cu ta den nos cu esun cu ta den mundo.
Den e situacion cu mundo ta awor aki, si bo ta scucha noticia, y mira con maldad ta avansa y cuminsa preocupa cu cosnan cu bo no por cambia, bo ta cay atras, pasobra bo ta kita bo bista for di riba Dios.
Corda bon con Pedro a cuminsa cana riba awa bay cerca Hesus, pero asina cu Pedro a pone bista riba e lama cu tabata bruto, y kita su bista for di riba Hesus, Pedro a cuminsa sink.
Esey ta pa siña nos cu con cu e tempo cambia y kico cu nos tende, nos bista mester keda riba Cristo Hesus, pasobra manera e Palabra di Dios ta bisa den Juan 15:4: Keda den Mi y Ami den boso. Mescos cu e rama no por carga fruta di su mes, si e no keda den e mata di wendruif, asina boso tampoco, si boso no keda den Mi.
Nos tin di prepara pa nos ta firme, den e tempo aki y den e tempo binidero, pasobra esun cu ta movi for di su proposito y cu ta bula manera chinchirinchi aki pa aya , ta keda manera un hende sin reis, y sin fundeshi, sin stabilidad spiritual den su bida.
Un hende no por core tras di tur cos cu e ta tende, y pensa cu asina e ta sirbi Dios, pasobra diabel tambe ta haci zonido bunita, pa asina atrae hende den e caminda di scuridad,
Daniel a para firme, aunke e situacion tabata dificil, aunke e tabata sa cu cueba di Leon tabata sper’e, e no a preocupa , pero den tempo dificil a sigui sirbi Dios, y Dios a sostene Daniel.
E sosten di Dios t’ey constante, pa esunnan cu ta reconoce Dios riba tur cos, y ta sirbi Dios cu un curason boluntario, pasobra hende no por sirbi Dios, con cu ta, Dios mester ta na prome luga den nos bida y nos curason.
Apostel Pablo a bisa: No cu mi a alcansa esaki caba,of cu mi a bira perfecto caba, ma mi ta haci mi esfuerso pa mi por gara e loke pa cual mi tambe a wordo gara door di Cristo Hesus. Rumannan mi no ta pretende cu mi mes a gar’e caba: Ma un cos mi ta haci: Lubidando loke ta keda atras y aspirando na loke ta dilanti, mi ta haci tur esfuerso pa alcansa e meta, pa haya e premio di e yamada celestial di Dios den Cristo Hesus (Filipensenan 3:12-13-14).
Diabel ta uza tur tipo di distraicion posibel, pa purba desvia e yiunan di Dios for di e caminda di Dios, p’esey nos mester persevera den Oracion y Palabra di Dios tur dia y asina mantene nos bista riba Cristo Hesus e Salbador di nos alma.
Ta imposibel cana den dos caminda, y come di dos mesa, pasobra Dios kier pa nos ta fiel, pasobra Dios ta fiel y na tur momento E t’ey pa nos, Dios a priminti cu nunca E lo bandona nos.
Ta tempo pa nos madura den Señor y comporta nos mes manera hende grandi, pasobra e palabra ta bisa: Tempo mi tabata mucha,mi tabata papia manera mucha,pensa manera mucha, rasona manera mucha, ma awor cu mi a bira homber, mi a pone cos di mucha un banda (1 Corintionan 13:11).
No ta tempo pa haci wega, pasobra dianan ta trabahoso, tempo ta dificil, laga nos sirbi Dios, tur momento.
Sinceramente,
Pastoor Marcel Balootje.
