No ta prome biaha cu polis ta presenta na Harmony Apartments situa na Ponton. Polis riba nan mes, ya no por haci mucho mas. A traha mutatie, a entrega keho, a informa departamentonan concerni pero keto bay ningun solucion. Tur biaha polis ta presenta pa intermedia entre turista y e doño di e apartamento.
E biaha aki un biaha mas tabatin problema c’un grupo di turista Colombiano. E turistanan a paga nan camber pa cinco dia. Debi cu a perde vuelo ayera, nan a yega awe pa check in. Na nan yegada, e doño a informa cu nan a perde nan camber y nan tin cu bay check cu booking.com pa ricibi nan placa bek. E turista y hasta e polisnan a haya esaki masha straño. Unabes bo paga bo camber, e dianan paga, ta pertenece na bo. Segun e doño, ya e cambernan no ta disponibel mas.
E turistanan ta sinti nan mes estafa, a purba tur manera pa yega na un solucion cu e doño pero sin resultado. Ta mesun comportacion di tur siman. Riba internet tin masha mal comentario di Harmony Apartments. E turistanan hasta a menciona cu riba internet ta pone algun potret di e apartamento y ora yega, ta topa cu algo completamente diferente, pues estilo un engaño.
Polis ya no por haci mucho, ta spera cu por bin un solucion unda cu e apartemento ta cumpli manera mester ta cu nan clientenan. Si esaki no ta e caso, un otro solucion lo ta pa kita e permiso di operacion. Pa 24ora.com, e adres aki ta uno conoci, pa hopi aña largo ta presenta semanalmente na e adres aki.
