Tin diferente instancia cu ta uni na Salubridad Publico pa promove esaki. Movemiento ta Bida tin un agenda druk cu ta hopi dirigi riba movecion pa e siman aki. Rudy Leysner a splica cu durante henter un siman, for di 2 pa dia 9 di April, lo bay tin un programa completamente dirigi na diferente edad.
Pero e clausura ta dia 6 di April. 6 di April ta celebra dia Mundial di Actividad Fisico, unda cu mundo ta celebra esey. E tema di e aña aki ta Sea Activo tur Dia. Mester keda activo tur dia pa haya e beneficionan di salud. E beneficionan di salud bo ta bay ripara ora cu bo ta haci actividad fisico tur dia. Por ehempel e adulto, por haci 30 minuut pa dia. E adulto mayor tambe 30 minuut. E hobennan 1 ora. Asina ta mira si bo haci locual ta recomenda pa World Health Organization, bo ta mira e beneficionan cu bo ta bay haya. Bo ta drumi miho, bo calidad di bida ta bira miho. E malesanan cronico cu ta malesanan pa hende grandi, cu actualmente e hobennan tambe ta sufri di dje, si cuminsa haci actividad fisico, ta mira e beneficionan. Haci’e pa tres luna, pa seis luna. Despues pa continua y bo ta bay mira realmente e beneficio.
Movimiento pa Bida a scoge caya grandi pasobra caya grandi ta hopi grandi. Kier bin cu diferente actividad. Manera dilanti di Djispie’s tin actividad pa e adultonan clasico, e adulto mayor. Tin tambe na ex Bon Bini Bazaar, lo tin weganan popular organisa pa Ibisa. Tin na CMB, tin grupo di danza. Tin dilanti di Dufry, Tang So Doo. Dilanti di ex La Linda, e parkinglot, tin marathon di zumba y tambe dilanti di Aruba Trading y Penha, tin Transition to Health lo haci cinco deporte cada 25 minuut. Ta bay tin Yoga, Tai Chi, Physiofit y tambe balance stretching entre otro. Dilanti di Sport Caribe, eynan e vosejacht lo cuminsa. Tambe riba Plaza Daniel Leo lo tin e parti di Kid’s Funsticle. Ta weganan popular pa mucha, pa hoben. Asina lo bay tin diferente actividad. E programa ta di 6’or y mey pa 8’or y mey dia 6 di April y 8’or y 45 lo bay keiro den Playa grandi. Ta cuminsa na Sport Caribe y ta caba pa 9’or. Di 9’or pa 10’or di anochi dilanti di Plaza Daniel Leo, Robert Jeando’r lo caba cu e programa. Asina ta celebra conhuntamente cu tur e stakeholdernan, ta invita comunidad di Aruba pa presencia esaki.
Actividad pa grandi y chikito
Por bin cu henter famia, pasa un dia agradabel for di 6’or di atardi te cu 10’or di anochi.
