Esaki ta un crucial pa mayornan. E preparacionnan ta cuminsa pa loke ta compra di materialnan di scol, pagamento di uniformnan, pago di schoolgeld, etc. Por mira hopi hende riba caya cu mucha en busca di e materialnan necesario.
E team di 24ora.com a haci dos tipo di encuesta. E prome tabata online unda riba e pagina di 24ora.como por a vota, sin duna splicacion, si nan ta kere cu scolnan mester habri nan porta of no. Mas cu 6900 persona a participa na e encuesta online aki unda cu 75% di e participantenan tabata di opinion cu miho scol no habriainda y naturalmente e resto cu ta 25% si tabata di acuerdo pa scol habri su portanan.
Tambe e Team di 24ora.com a subi caya pa combersa cu algun persona riba e mesun punto aki. E diferencia ta cu esnan den e POTS (People on the street) ta cu e resultado ta mustra net lo contrario. E hendenan ta na fabor pa apertura di scol.
Tabatin sra Arenas, kende a splica cu berdad el a subi caya cu su yiunan pa compra di materialnan di scol y el a keda sorprendi cu e prijsnan di producto pa scoltoch tabata alcansabel. E ta di acuerdo pa scol habri pa motibo cu e muchanan a perde hopi luna caba di enseñansa. Studia na cas pa muchanan sigur no ta duna mesun resultado. Nan mester di un espacio pa concentra riba e les cu nan ta haya,a demas di e tempo pa comparti cu compañeronan tambe. Mirando tur e reglanan cu scol a pone pa e muchanan,e no ta kere cu e lo ta un riesgo pa nan salud. “Mi ta spera tur cos bay bon.”
Un dama hoben, Shahaira, kende tabata di compras pa su sobrinanan, ta haya cu tur cos ta depende di e scol. Si un scol tuma e medidanan unda cu tin tur e proteccion necesario pa salud di studiante- y docentenan, e no ta mira motibo pa laga scol cera. Sra. Croes tambe tabata di e mesun opinion. Tur scol mester tin nan schedule reparti di con ta duna les den cada grupo y tumando medidanan di precaucion pa higiena ta haci cu scolnan por habri.
Sr. De Jong ta haya cu ta papia di medidanan di precaucion cu a tuma pa loke ta higiena, pero e ta keda cu poco duda. Specialmente pa loke ta e muchanan chikito cu no ta gusta para keto. E ta spera si e lo no bay trece mas problema di salud.
Pa sra. Audrey ta ok pa habri e scol. E muchanan mester di un localidad unda pa concentra riba nan enseñansa. SI nan ta haya les na cas, nan no ta concentra y ta hunga, y no ta pone atencion na e lesnan. E ta preocupa cu e coronavirus, pero mester tuma e riesgo. “Nos mester siña biba cu ne. Percura pa tur mucha tin nan mask, nan hand sanitizer y bisa e yiunan comparti pero no cera di otro.”
Maria Honores si no ta di acuerdo pa habri e scolnan. E hecho aki no solamente ta pone e hobennan na riesgo pero e adultonan tambe cu mester subi caya pa cumpra materialnan di scol, pasando na diferente luga. Tin e parti economico, pero salud ta na prome luga. “Awo nos ta para den fila, treciendo peligro pa nos. E miho forma ta pa sigui estudio online.”
