Despues cu e doñonan di gym a reuni cu gobierno y siman pasa cu a anuncia relahacion di varios medida, awe, dialuna e gymnan por a habri nan porta. Jose Polanco, asistente di gym na Fit Factory a conta cu nan ta hopi contento cu nan por a habri bek.
Training den exterior (outdoor) ta manera un cardio pero no tin e mesun comodo compara cu un gym. Fuera di esey nan por cumpli cu e protocol manera ta stipula.
Pafo semper tin su riesgo ora tin training. E vloer no ta completamente flat den tur zona. Ora haci squat, no por haya un espacio nivela. Awo cu gym ta habri por tin mas comodidad y tambe por controla e asistencia, semper manteniendo control, haciendo e zona mas sigur pa miembronan.
Polanco ta sigui bisa cu ceramento di gym no a bay den un bon manera, ni tampoco no tabata un bon decision.
Por a mira cu a pesar gym tabata cera dos siman y e casonan a keda casi mesun cos, mesun halto.
Polanco no tin nada malo di bisa di e barnan, pero ta cera un luga unda cu hende ta bin pa haci ehercicio, pa ta mas saludabel, y ta laga otro luganan habri caminda cu tin fiesta, otro luganan cu si ta permiti otro medionan di contagio.
Si compara un supermercado cu un gym, un persona cu sali bay haci compras por ehempel, e ta coy un articulo, y si e dicidi di no cumpr’e, e ta pone bek. Ningun hende no ta haci e articulo aki limpi.
Contrario di un gym, nan ta mas estricto. Despues cu haci uzo di e aparatonan, nan ta haci esaki limpi. Tambe nan ta train constantemente cu tapaboca. Tambe nan ta mantene nan distanciamento local. Fuera di esey nan tin un capacidad di hende cu por train na e mesun momento.
Pa e luna cu a pasa, Polanco, como trahado den Fit Factory, el a keda cas berdad, pero e no por a cubri gastonan di cas. Sin lubida cuminda. Ta bon mes el a haya su clientenan pa train online y tambe cant’i lama, e ta conta. Aunke cu na lama mes, aunke cu ta mantene na 2 pa 3 hende, cada un mester haci di su mes pa mantene e protocol. Esta cada un mester a bin cu nan propio tapaboca, nan propio peso y mat. Polanco tabata duna guia, a pesar cu luga den aire liber tabata incomodo.
Ta bon mes no tabata tin mal tempo. Si tabatin mal tempo, e no por a duna les. E lo mester a sigui duna les online cu cierto grupo di cliente. Tambe haciendo trabaonan informal, manera laba auto pa haya tiki cen pa por mantene su famia.
Por ultimo Polanco a comenta cu prome cu tuma un decision duro manera cu a tuma ultimo biaha pa cera tur gym, mester check prome cua gym specificamente no ta cumpli cu protocol y regla. E gym ey mester haya boet. No ta tur gym mester paga pa uno cu no a cumpli.
