E aña aki tabata prome biaha cu Gucci Dancers a organisa un fiesta di Dera Gay. Esaki a tuma luga na Centro di Bario Brazil.
René Kock, Director di Gucci Dancers, a indica cu nan a pidi acerca comision di Centro di Bario Brazil, pa e aña aki nan como Gucci Dancers organisa e fiesta cultural grandi aki. E idea tras di e evento aki, tabata pa primeramente, un dia grandi asina, e centro no keda bashi y tambe pa e pueblo di Brazil y San Nicolas bini hunto y celebra Dera Gay hunto.
Diadomingo Gucci Dancers tabatin un actividad na Centro di Bario Lago Heights y p’esey dialuna a dicidi di hacie fiesta di Dera Gay na Brazil. Idea ta pa duna tur e centronan y e hendenan bini hunto, pa celebra Aruba su folklore.
E programa tabata uno cu hopi fluidez, unda cu e ganadonan di Himno y bandera a duna un presentacion como tambe e ganadonan di e Prome Festival di Dera Gay. Di e manera aki, cada uno ta pone di nan banda pa yuda mantene y engrandece nos cultura.
Tabatin mas grupo di baile cu tambe a presenta, entre cual Fofoti Dancers cu a baila tres cancion e anochi aki. Y Gucci Dancers tambe a yuda carga e anochi, cu diferente baile folklorico.
Como director di baile di grupo, Kock a haci un yamada na tur e hobennan pa engrandece nos folklore y cultura, pa no laga esaki bay perdi. Hunto nos por haci un diferencia den mantene nos herencia cultural bibo!
