Loke tabata Plaza Shopping Center y despues Royal Plaza di defunto Shea Lichtenstein, awor a pasa den man di e inversionistanan Venezolano, e rumannan Perret-Gentil di e Grupo Pering. A paga algun miyon florin pa adkiri e propiedad, cu a pasa pa sobrinonan di defunto Shea, pasobra e no tabatin yiu.
E plannan concreto awo ta cu e piso abou lo keda pa e famia mes, cu lo sigui atende cu e huurnan comercial pa Iguana Joe’s, Tommy Hilfiger, e joyeria y mas. E piso mas abou como tal lo sigui di ta destina pa comercio y tiendanan di benta. Parce cu e compania di seguro y pensioen ENNIA a financia e parti ey. E di dos y di tres piso lo bira condominio.
E proyecto
Royal Plaza Mall ta un punto di referencia cu ta conta cu un diseño di arkitectura unico di estilo Hulandes y un plasa central vibrante den Oranjestad, ta programa pa un actualisacion innovativo. E proyecto aki lo integra 62 condominio hunto cu e espacio comercial di Royal Plaza Mall, fomentando un espacio di bida moderno mientras cu e ta mantene e estetica iconico reconoci den Caribe Hulandes.
Casa Playa Residence no ta djis un remodelacion, sino un renacemento di e estilo urbano di Oranjestad. E proyecto aki ta pas cu e vision di modernisa e centro di Oranjestad, treciendo un ola di modernisacion n’e curason historico di Aruba. E futuro residentenan por anticipa p’e inicio di e proyecto aki, cu e fechanan exacto cu lo anuncia pronto.
E centro residencial y comercial ta un ehempel di e combinacion perfecto di un bida relaha y urbano, ofreciendo comodidad manera un infinity pool cu bista pa waf, un espacio pa train y diferente opcion pa come cu un bista pa lama.
Royal Plaza tin historia
A construi Royal Plaza Mall na aña 1995. Tabata un concepto di arkitecto Fernadez-Pedra. E propietario tabata Shea Lichtenstein. E negoshi tabatin su bon temponan y su temponan menos bon. Parkeerplaats semper a keda un reto y despues falta di mantencion regular a cuminsa “catch up” cu e edificio, cu a causa cu pocopoco el a cuminsa bay atras y a deteriora. Asina negoshinan y tiendanan a cuminsa sali un pa un, te cu el a keda relativamente bashi y sin “bida”.
Grupo Pering awo a bula aden y a cumpr’e pa desaroy’e den un proyecto di condominio. Nan a desaroya varios proyecto di condominio na Aruba caba, manera ta Harbour House den Weststraat net banda di waf chikito, Azure Beach Residence, Oceania Residences y Blue Residences, tur situa riba JE Irausquin Boulevard cerca di Eagle Beach.
Plaza Shopping Center a kima y despues bira Royal Plaza
Tabata dia 20 di april 1984, den e oranan trempan riba un Bierna Santo, cu un candela grandi a apodera di Plaza Shopping Center. Tabata 5:30 am cu a drenta melding na polis cu ta mira huma y candela saliendo for di Pizza Newyorker. A constata cui e dak y e di dos piso di e edificio tabata na candela. Den e parti ey tabatin Oficina Maritima, Plaza Antilles Communication y Anthony Veder. Solamente Van Kessel photoshop y Plaza Bookstore a scapa for di e candela feroz aki. Prome cu e supermercado Hendersons den Plaza Shopping Center, e supermercado eynan tabata yama La Esperanza.
Loke a resta di edificio a habri algun tienda chikito di souvenier. Den añanan 90 a habri e nightclub Blue Wave pa un temporada. Na final a basha henter e edificio abao y a desaroya Royal Plaza Shopping Mall.
