Diabierna anochi a tuma luga un charla informativo tocante cancer di prostaat y otro malesanan urologico. E actividad tabata organisa pa Asociacion Amigos de Colombia hunto cu Fundaicon VeneAruba Solidario, ademas di otro organisacionnan. E encuentro a tuma luga na e Centro Comunitario di HIAS na Oranjestad.
Moises Fernandez, president Asociacion Amigos de Colombia a splica cu pa e charla a bin cu dos urologo di Colombia, specialista den cancer. Cancer di prostaat tin un gran incidencia den hende homber, pero asina mes tin keto bay hopi reserva of miedo pa haci test of busca tratamento; un actitud cu por resulta mortal.
Cu e preocupacion ey y interes pa comunidad a bin cu e charla pa por habri y puntra na e expertonan pa kita tur duda. “Prevencion semper ta miho cu cura,” Fernandez a bisa. Basa riba su experiencia propio el a bin cu e iniciativa di charla, preocupa tambe pa e cantidad halto di casonan cu tin na Aruba. E asociacion ta buscando actividadnan relevante y productivo pa ofrece no solamente pa e comunidad Latino riba e isla, pero pa e pueblo di Aruba en general.
Gustavo Adolfo Salazar Trujillo, urologo di Bogota, tabata un di e oradornan na e charla. El a splica cu e obhetivo principal ta e prevencion na tempo. Hende mester sa ki ora ta importante pa consulta dokter, maske no ta presenta sintoma ainda. Cancer di prostaat ta e di dos mas comun despues di cancer di pulmon y e peliger mas grandi ta pasobra e ta asintomatico. Sinembargo, tin diferente manera di diagnostica esaki na tempo. Algo pa tene cuenta cu ne ta ora e persona tin dificultad pa pishi, si e ta wak sanger den urina of tin problema cu infeccion.
E di dos orador tabata Manuel Sierra, ciruhano specialista den urologia. Mescos cu su colega, el a enfatisa riba e promocion di prevencion di malesanan urologico cu ta afecta hende homber, aunke a menciona cu hende muhe tambe tin patologianan urinario, manera incontinencia, y el a papia di esaki tambe cu e participantenan. E pilar fundamental ta pa ataca e malesanan prome cu tempo. “Ora bo preveni un malesa, ta un win win situation pasobra e pashent ta gana y e sistema di salud tambe ta gana,” e dokter a bisa.
