Wilhelminastraat Investors Group Aruba ta hopi contento cu e desaroyo recien den centro di Oranjestad. Specialmente den Wilhelminastraat ta experenciando un transformancion notabel, danki na e esfuerso continuo di entre otro Minister Geoffrey Wever, Ministerio di Asuntonan Economico Telecomunicacion y Desaroyo Sostenibel, DOW, Monumentenfonds, APFA y otro organisacionnan envolvi.
Hunto cu e team cu ta duna suport na Wilhelminastraat Investors Group, ta logrando un cambio importante pa Oranjestad. Mehoracion den infrastructura, preservacion di patrimonio cultural, y fortalece e sentimento comunitario ta hunga un rol crucial den redefini Wilhelminastraat y e areanan rond di dje.
Mehoracion di Infrastructura
Den e ultimo lunanan, a logra un avance significativo den e mehoracion di infrastructura den Wilhelminastraat. Entre otro, a completa fase 2 di e trabou di revitalisacion rond di Plaza Comercio bay Suikertuin, cu a ceda cla na fin di mei.
E siguiente fase di e proyecto aki ta bay concentra den renoba y amplia e parkeerplaats, cu e meta pa haci parking mas sigur y accesibel. E proyecto aki no solamente lo mehora e comodidad pa bishitantenan, sino tambe lo aumenta e visibilidad y lo haci e area mas atractivo.
Preservacion di Patrimonio Cultural
Otro aspecto importante di e revitalisacion ta e preservacion y restauracion di edificionan iconico den Wilhelminastraat. Un ehemplo di esaki ta e restauracion di “Cas Veneranda” financia pa APFA. E proyecto aki ta den su fase di demolicion y preparacion pa un destaho publico. E edificio restaura lo duna luga na Departamento di Asuntonan Economico. Ademas, lo tin un espacio publico pa reunionnan priva y un espacio pa un restaurant.
E iniciativa aki ta fortalece e vitalidad economico den e centro di ciudad mientras cu ta preserva su caracter historico.
Desaroyo y Proyectonan Nobo
Tin plannan grandi pa e edificio na Wilhelminastraat 40, miho conoci como “Warda di Polis”. E desaroyo di un boutique hotel na e luga aki lo contribui signitivamente na e renobacion di Wilhelminastraat. Banda di e proyecto aki, e mesun grupo di desaroyo ta trahando riba otro tremendo proyecto di renobacion entre Van Walbeeckstraat y Nieuwstraat esta cas di Adrian Lacle, cu sigur lo haci e centro di ciudad mas atractivo. Tambe, e edificio den Zoutmanstraat, caminda Cámara di Comercio tabata situa antes, ta pasando door di un metamorfosis; e edificio renoba lo bira e oficina nobo di Atlas Risk Solutions.
Durante luna di juni, lo duna un atencion special na limpiesa di nos centro di ciudad, cu manteniendo y plantamento di mata y renoba e bakinan di sushi. Tur e actividadnan aki ta solamente e cuminsamento di un serie di esfuerso cu lo wordo anuncia pronto, tur cu e proposito di revitalisacion di e area di Wilhelminastraat/Columbusstraat.
Wilhelminastraat Investors Group Aruba ta keda dedica na e transformacion di nos centro di ciudad esta Oranjestad. Nos ta sigi stimula tur esfuerso pa mehora su infrastructura, preserva su patrimonio cultural y tur iniciativa pa proyectonan nobo. Esaki lo haci centro di e ciudad un destinacion atractivo pa hendenan local y tambe tur bishitante.
E desaroyonan positivo aki ta solamente e cuminsamento di un futuro briyante pa Oranjestad.
