Portugal a topa cu Slovenia den e octavo final di Euro 2024 Alemania. Hopi ta esunnan cu ta fanatico di futbol y como semper e fanaticonan di Portugal a topa na Club Primavera pa sigui e wega.
Un wega cu a termina den 90 minuut empata na cero, a sigui pa extra tempo, tambe a termina empata na cero. Esey a pone cu mester a bay tiro di pinalti. Portugal a anota tres gol di pinalti, mientras cu e keeper Portugues a preveni esunnan di Slovenia anota. Cu e resultado aki Portugal a avansa y diabierna ta topa Francia den kwart final.
Un fanatico masculino a expresa cu e sentimento ta tremendo. El a indica cu nan a sufri, pero na final nan a gana e eliminatorio. E victoria aki pa nan tabata mas special pasobra tabata Dia di Madeira.
Un otro fanatico femenino a expresa cu nan tabata tin hopi nervio y nan ta sumamente feliz cu Portugal, riba Dia di Madeira, a logra gana. E ambiente na Club Primavera tabata tremendo, pero nan ta habri tur dia pa e weganan di Eurocup y Copa America. El a invita comunidad di Aruba pa pasa cerca nan y mira e weganan di futbol. E ta feliz cu Portugal ta den kwart final.
