Ta parce cu si no tin pelea no tin Jouvert Morning, por lo menos algun lo comenta esey. No a pasa ningun parada di Jouvert Morning sin un bringamento. Den aña 2024 ta mesun tiro. Henter marduga pa mainta polis tabata man yen cu un cantidad di pelea rond di e parada. Algun chikito cu polis ni a logra yega y otro mas grandi.
Alrededor di 8:25 am tabatin un pelea di gang dilanti di Ton Li Supermarket riba Weg Sero Preto. Un gang di como dies homber a baha riba un solo hoben. A hinc’e cu boter na su nek, moketie y skop e formalmente. Un homber n’e sitio cu a presencia e abuso y a dicidi di para memey di nan estilo “want’un rato, ta kico esaki ta anto”. El a nota cu e victima tabatin corta na nek y a kita su flanel pone rond di e garganta.
Den tur situacion malo semper tin algo bon cu por saca afo. Den e caso aki, e parti bon ta cu camara di siguridad a capta tur cos. Algun minuut despues, recherche a presenta y a tuma tur informacion necesario. Ainda tabatin sanger dilanti e supermercado. Di e forma aki, polis tin un bon bista ken tur a tira sla, ken a corta e homber cu boter y ken tur a forma parti di e gang.
Den casonan similar asina den pasado, fiscal ta aplica e regla “samen uit, samen thuis” y ta pidi mesun castigo pa tur. Ta bon pa e hobennan aki realisa, cu e crimen “openlijk geweldpleging” tin un castigo di mas cu cuater aña di prizon riba dje. E ta encera ora mas cu dos hende dicidi di bringa contra otro(nan) riba un area publico, pues riba caya.
Mayoria biaha ta aplic’e ora di pelea di gang riba caya. Manera e caso di awe mainta, cu dies hoben ta yega bati un solo hoben memey caminda dilanti un supermercado, dilanti tur hende…ta pas net pa e ley encuestion.
Pa tur cu a tira sla, por spera bishita sea di recherche of team di aresto na bo cas durante e proximo oranan nos dilanti. Nos conseho: drumi cu mita wowo habri y cu carson na curpa, pa ora nan yega, no bay cu bo den boxer short!
