No ta e prome melding pasobra algun dia pasa caba un turista a bati alarma pa un “teerball”, esta un mancha di azeta cu a spula na costa. Awe mainta atrobe ta habri cu un mancha mucho mas grandi y pisa na costa noord di nos isla. Cu esaki oficialmente por nota cu Aruba ta bira victima di un oilspill na Trinidad & Tobago, cu awo ta sushando nos beachnan.
Ta mas cu un luna pasa cu a bati alarma pa un derame di azeta den lama na Trinidad & Tobago. E tempo ey ningun hende tabata papia di e topico aki te ora cu riba 23 di februari 2024 e efecto di e derame a yega na nos isla ruman Boneiro. E tempo ey a nota pisca morto y varios parti preto cant’i beach.
Despues cu el a yega Boneiro, departamento di gobierno di Aruba, manera entre otro Crisis Management Office (CMO) a indica cu Aruba a pasa di codigo geel pa codigo oraño. Hasta a bisa cu no ta spera cu e lo yega Aruba mirando e direccion di coriente den lama.
No obstante cu Aruba ta mas cu 800 KM leu di Trinidad & Tobago, asina mes riba 9 di maart a nota varios mancha di azeta na e costa noord di nos isla. Esaki ta net un poco panort di Natural Bridge, net parti patras di un rancho, cerca di Boca Sardinchi caminda cu tin un area completo cubri cu azeta.
Un ekipo di Headlines Group t’e prome nan cu a yega na e sitio pa tuma nota di e situacion. Ainda e ta hole puro petroleo. Mientrastanto tin hasta prueba den man, pero ainda Gobierno di Aruba bou encargo di vice Prome Minister Ursell Arends, ta na soño y no sa di e situacion.
Gobierno a laga sa cu nan ta den e proceso di monitorea, mientrastanto e azeta hasta a cuminsa pega di un forma duro caba riba nos baranca. Esaki ta un situacion peligroso y hasta un menasa nacional, ta spera cu pronto, vice-prome Minister di Aruba, Ursell Arends alabes ministro di naturalesa porfin lo mobilisa pa e sitio y cambia e codigo di oraño pa cora sino ta preto.
En todo caso trece un solucion, e situacion ta un echo caba, awo ta di mira si lo cera henter e area y sigui mira na tur e bocanan si tambe ta mancha cu azeta. E trabou awo ta di limpiesa y pa evita cu mas mancha di azeta lo yega y afecta nos beachnan. Na Boneiro a haci uzo di Cuerpo Militar pa haci e trabou di limpiesa. Aki ta papia di uza boluntario.
