Diabierna anochi a cende e luznan di orguyo pa ilumina Bestuurskantoor den cuadro di e Dia Internacional di Orguyo.
Presente e anochi aki tabatin Minister Ursell Arends a indica cu durante ful e aña Fundacion Orguyo ta sostene actividad den comunidad pa informa comunidad y pa duna nan respaldo y guia riba e temanan di igualdad. Esaki tambe a haci cu Gobierno a ilumina Bestuurskantoor cu e colornan di regenboog, cu cual e comunidad LGBTQ+ ta identifica nan mes.
Segun e mandatario, nan a haci esaki pa asina mustra e comunidad LGBTQ+ e sosten y mustra nan cu nan ta wordo scucha, nan ta wordo mira y cu Gobierno di Aruba ta para hunto cu nan den e lucha aki. Ta spera cu esaki ta e ultimo biaha cu no ta hisa e bandera di LGBTQ na Bestuurskantoor. Ta spera cu den futuro, Aruba, mirando cu ta bayendo den e direccion positivo. Stap pa stap e comunidad LGBTQ+ tambe ta hayando su luga den comunidad. Esaki ta algo cu Gobierno di Aruba kier sigui traha pa garantisa igualdad pa tur hende den nos comunidad.
E anochi aki tambe a conta cu presencia di varios miembro di e comunidad LGBTQ+. Tesorero di Fundacion Orguyo, Lydianne Croes-Kan a bisa cu e iluminacion simbolico tabata como muestra di sosten di algun miembro di Gobierno di Aruba na e comunidad LGBTQ+.
Ta spera cu esaki no keda na un acto simbolico y cu di berdad Gobierno di Aruba sigui den e lucha pa logra igualdad pa tur hende.
