Den conferencia di prensa di obierno prome minister Evelyn Wever Croes a splica con leu e proceso ta andando pa haya un destinacion pa e facilidadnan di e refineria.
Gobierno di Aruba a cuminsa cu un Request Expression of Interes 1 y 2. Den REOI 1 tabata tin opcion A y B. Opcion A tabata reapertura di refineria y e instalacionnan existente y opcion B ta desaroyo industrial adicional nobo dentro di e area di refineria. Banda di esey a habri mesora tambe REOI 2 cu ta duna un opcion C, cu ta desaroyo industrial nobo cu ta bay reemplasa instalacionnan existente di e refineria.
E publicacion di REOI 1 y 2 a sosode dia 18 di juni. Riba e dia ey a publica y a informa internacionalmente cu Aruba ta habri pa busca desaroyadornan nobo. Tabata tin den prome instante te cu dia 17 di juli pa reacciona, pero debi na COVID, a rek esaki ta cu dia 31 di juli.
Riba e fecha aki notario a habri e filenan electronico, manera cu cada interesado a mailnan na e notario.
Un siman despues, e notario a manda tur e datonan pa RDA pa por cuminsa cu e trabao di evaluacion.
Comienso di trabao di evaluacion, tabata den man di un advisory branch, institui den un decreto ministerial, dia 30 di juni 2020. E advisory branch aki, dia 10 di september, nan a duna un rapport di recomendacion caba encuanto e prome fase di tanto REOI 1, como 2.
Nan a informa Gobierno di e resultadonan y a informa interesadonan tambe. Tabata tin 48 interesado cu a cumpli na prome instante cu tur rekisito, manera prescribi.
A conclui e fase 1 y a involucra Departamento di Asuntonan Economico pa asina haci e calculacionnan macroeconomico riba e impacto.
E resultado di e evaluacion e ora den e REOI-1, tabata tin 26 interesado y e REOI-2 tabata tin 22 interesado.
Awor aki ta den fase 2, esnan cu no a pasa uno pa dos, ta tene nan pendiente, pasobra no sa si ta bay keda cla cu un di nan, pues por bin bek riba nan. RDA a establece un data room, caminda cu tur informacion di e terenonan ta disponibel pa tur e interesadonan haya e informacion aki.
Tambe ta asina cu a duna un invitacion na tur esnan cu a pasa pa fase dos pa duna un binding offer, esta un oferta unda cu nan ta duna un oferta cu ta mara nan y ta mara Gobierno riba dje, si en caso cu acept’e.
Tambe a firma un non-disclosure agreement pa garantisa cu e informacion cu nan haya di e refineria nan ta keda cun’e y no ta lek.
Interesadonan cu a pasa pa fase 2 tambe a haya oportunidad pa bin bishita Aruba y haci nan propio evaluacion di instalacionnan pa asina haya un tour y mira e dataroom, si en caso cu nan tabata kier.
E Advisory Branch ta den Fase 2, finalisando e fase y prome cu fin di november e ora lo informa Gobierno di e resultado di Fase 2.
