Departamento di Relacionnan Exterior di Aruba ( DBB) recien a ser informa di e siguiente cambionan den e maneho di Visa di e Gobierno di Canada:
Gobierno di Canada ta informa cu, después di un amienda regulatorio di nan “Inmigration and Refugee Protection Regulations” nan ta amplia nan programa biométrico pa tur ciudadano stranhero kendenan ta aplica pa un visa di turista (cu algún excepción); permiso pa studia of di trabou (cu excepción di ciudadanonan Mericano); permiso di residencia temporario y tur esnan cu ta aplica pa un permiso pa residencia permanente of status di refugiado of asilo, entrante 31 di juli, 2018.
E siguiente link, http://www.cic.gc.ca/english/information/applications/student.asp , ta duna un splicacion amplio di e proceso menciona.
E CAMBIO LO AFECTA TUR CIUDADANO CU PASPOORT HULANDES
Tur ciudadano di nacionalidad Hulandes, entre 14 y 79 aña di edad, kendenan lo aplica pa un permiso pa studia, traha of di residencia permanente na Canada, lo mester suministra nan “fingerprints” y potret na e Centro di Aplicación pa Visa, mas cercano, entrante 31 di juli, 2018.
Pa esnan viahando for di Aruba, Corsow of St. Maarten, e centronan di aplicación mas cercano ta situa na Port-of-Spain, Trinidad & Tobago, Santo Domingo, Republica Dominicana, Bogota, Colombia, y na Caracas, Venezuela. E informacion biométrico tin un validez di 10 aña. Pa esnan viahando for di Hulanda, e Visa Application Centre mas cerca ta situa na Dusseldorf, Alemania of na London, Inglaterra.
Ciudadanonan cu paspoort hulandes cu ta bishita Canada como turista, no tin mester di aplica pa un visa (nan ta visa exempt) y nan tampoco mester suministra informacion biométrico. Sinembargo ta rekeri un Electronic Travel Authorization valido si. Hefenan di Estado, Ministernan, otro oficialnan gubernamental y diplomaticonan acredita aplicando pa un visa, no mester suministra informacion biométrico.
