Durante entrevista cu Jacco Vroegop, director di dr. Horacio Oduber Hospital dialuna merdia den Enfoke, a puntr’e si gobierno tin un debe cu hospital. Ta papiando aki di un suma di riba di 10 miyon florin cu gobierno di Aruba ta debe y esaki tin varios aña canando.
Tabata tin un pago seis of shete aña pasa pero desde e tempo ey tin un debe nobo atrobe di riba 10 miyon.
“Nos ta papia hopi di dje, manda carta y dialoga, y esaki ta un tema fastioso pa gobierno pasobra nan sa cu mester haci algo, pero nos no por tin un solucion facil,” segun e director. Ta spera si cu por regla esaki pronto p’e placa aki bay bek na hospital, na su turno bek den nos comunidad, segun Vroegop.
UN TEMA FASTIOSO PA ARUBA
E echo cu tin asina hopi ilegal na Aruba ta un problema tambe, y tin hopi mas di loke nos ta pensa, segun Vroegop anto varios ta traha den construccion etc,. “Y mi ta di acuerdo cu si legalisa nan, por contribui na nos scolnan, careteranan y mas, pero e fastioso pa tur gobierno ta kico ta nifica ora diripiente bo legalisa un grupo grandi, otronan ta pensa cu ‘Aruba is the place to be’ y nan tambe ta bini aki banda, y esaki ta un tema fastioso pa Aruba.”
