E binimento na poder di MEP, ta basa riba un promesa falso. Ta importante pa ripiti cu esaki ta un grupo di hende cu a uni, pa nan ta na poder, pasobra cu nan tin sponsor pa cumpli cun’e. Esey por bis’e cu boca grandi, pasobra cu tin confirmacion y tin hasta di e sponsornan mes cu a bisa, cu nan ta doñonan di e partidonan aki y nan tin cu haci loke nan kier, segun parlamentario Arthur Dowers.
Esaki ta partidonan cu ora nan a sinta, a bin na un comision di arbitrahe, cu na momento cu haya problema cu otro, na momento cu nan ta sinti cu e gobierno ta tembla, cu e sponsornan ta bin hunto manera den un sorto di hunta directiva, pa nan dicidi si gobierno aki ta bay of nan ta keda. Pero loke pueblo tin cu realisa, cu nan a engaña e pueblo, aunke nan no a gana e eleccion, sino AVP, toch nan por a cera e pacto diabolico cu nos ta mira awe.
Esaki ta un gobierno cu ta priminti cu ta bin cu 7 minister. Awe nos ta papia di mas di 9 minister, pasobra tin 8 oficial, tin un secretario di estado, cual Evelyn Wever-Croes a bisa esey. Y tambe tin algun veterano cu a sali for di museo y nan ta esnan cu ta dirigiendo cierto parti di Gobierno.
Pa loke ta finansas, ta wordo dirigi pa un persona cu a bin di un museo. Pakico? Pasobra e minister actual cu tin, no ta compronde con finansas ta funciona. E minister aki no solamente ta compronde, pero tampoco tin e respet y no por contene su mes pa e por tin e respet cu mester tin, pa e profesionalnan, pa asina ey yud’e pa e por sigui cu e proceso pa percura cu ta bin cu jaarrekening, manera cu AVP a bin cun’e.
E minister aki ta uno cu a bisa cu nos ta den crisis financiero.
Parlamentario Dowers a menciona cu esaki ta e mesun minister cu no por a cana baha dos pa tres trapi pa atende cu sindicato. Ta e mesun minister balia tur carnaval, henter weekend. Ta su derecho, pasobra Carnaval tey pa fiesta y ta bon pa e gruponan tambe, pa tin hende den grupo y pa esnan cu kier wak. Pero tin cu tene cuenta cu a bisa pueblo cu nos ta den crisis. Si bo ta den crisis, ta spera cu e hendenan aki ta sinta di dia y anochi. AVP tempo cu tabata tin problemanan serio, no ta mira nan, cu excepcion di e spindoctor cu tabata biba den carnaval. Si tabata necesario, e ministernan tabata traha diasabra, diadomingo, durante pasco, pa percura pa e cosnan cu mester wordo regla, wordo regla.
Tin pais cu tin crisis financiero y abo ta esun cu ta bati curpa den Carnaval, di dia y anochi. Ta bon pa pueblo ta conciente di esaki y pa analisa bon, ora cu e hendenan aki papia cubo. Loke bo ta mira awor aki, ta e wolfnan den cuero di carne. Nos tin un minister presidente cu na momento el a bisa pueblo cu nos ta den crisis, a sali bay, forma un gobierno pura pura, bay shop.
Esey ta e tradicion. E tradicion ey a sigui, siendo cu e pais ta den crisis. Awor ta papiando di e crisis di e tempo aya, cu prijsnan no ta mucho halto. A sinta den gobierno y prijs a subi. Tin caminda cu tabata tin cierto productonan cu tabata bin na prijs rasonabel, e prijs a wordo kita. No ta mira cu ta haciendo un esfuerso pa e producto ey yeba. No ta mira e esfuerso pa cumpli cu e promesa di amplia e canasta basico. No ta mira cu ta haciendo e esfuerso pa cumpli cu bahamento di pensioen cu a wordo priminti. A mira cu no haci ningun esfuerso pa duna airco na tur e scolnan cu a priminti. Y duna e aumentonan cu a priminti na tur e sindicatonan.
Parlamentario Dowers ta spera un biaha mas cu pueblo ta conciente y mentiranan cu a wordo hiba pa e gobierno aki, pa pueblo ta conciente di e tipo di piraña cu ta landando den Cocolishi. Nan tabata kier ta eyden, pasobra nan tin cos pa fix. Ora bo mira cu pirañanan aki a insulta den e simannan cu a pasa, e miembronan di sindicato, insulta ambtenaarnan, yama nan pa ken cu ta, y dia pa dia ta mira, ken nan ta agregando na nan staf. Ta spera cu prensa, sino ta AVP mes tin cu haci’e , pa divulga kendenan ta trahando den bestuurskantoor y si berdaderamente e ambtenaarnan di Aruba ta ken cu ta, of ta e minister, parlamentarionan y esnan cu ta sinta na e momentonan aki, hunto cu nan den Cocolishi, ta esnan cu ta ken cu ta.
