Gobierno a anuncia medidanan adicional awe nochi, como consecuencia di e cantidad di casonan positivo di Covid-19. Riba un solo dia a raporta 39 caso mas y tur ta residente y un gran parti di dje ta bin di contagionan cu a tuma luga debi na asistencia na clubnan nocturno na Aruba.
Ta resultado di contagio di 2 siman pasa. Esey ta haci cu tin cu monitorea den e dianan aki y no ta descarta cu e cantidad aki lo subi. Pa e motibo aki mes Gobierno a dicidi di aplica mas medida.
Prome Minister di Aruba, mr. Evelyn Wever-Croes, a enfatisa cu no ta coriendo tras di e efectonan di e crisis y pesey ta tuma e medidanan aki.
Cu e medidanan aki ta tuma tur paso posibel pa evita cu mester yega na un shotdown, lockdown, un toque de queda of un shelter in place. Ta prefera di señala sectornan di riesgo, cera nan, en bes di cera tur sector di Aruba, pa asina no afecta nos economia atrobe, mescos cu prome biaha.
Decisionnan tuma ta cu tur bar, rumshop y nightclub ta cera entrante awe nochi caba. Pa loke ta fiesta na cas, tabatin tendencia di organisa fiesta na casnan priva caminda ta bende ticket cu musica. E fiestanan aki no ta permiti mas. Fiesta di famia grandi cu musica tampoco lo ta permiti.
Di tres medida ta tocante tapaboca. Pa cuminsa den transporte publico e uzo di e tapaboca a bira obligatorio. Y transporte publico ta bus, autobus, tambe taxi y tourbus. Cualkier persona cu haci uzo di cualkier di e transportenan publico aki ta obliga pa bisti tapaboca.
Tambe si bo mester bay den un establecimento of supermercado, tambe bo mester tin bo tapaboca bisti.
