Riba dia 2 di febrauri 2024, Comision Fiho di Enseñansa di Parlamento, a reuni cu Minister Endy Croes pa trata e topico di “normbedrag” mas den profundidad. Durante e reunion, Minister Croes a presenta e resultado di e investigacion y tambe kico tur a tuma luga na trabou pa por logra bin cu e ahuste cu recientemente Parlamento a aproba.
Prome cu a trata e resultado di e investigacion cu Minister Croes, a splica encuanto e gastonan cu e normbedrag cu scolnan ta ricibi, ta cubri. Esaki ta parti den 7 categoria di gasto:
- Costo di mantencion y seguro di edificio di scol y lokaal
- Costo di limpiesa (schoonmaken) di edificio, lokaal y gastonan di coriente, awa y gas
- Costo di mantencion di mueble di e scolnan
- Costo pa cumpra material di desaroyo, “hulpmiddel” y necesidadnan di scol
- Administracion
- Costo di comision di mayornan
- Otro gastonan pa garantisa e “buena marcha” di enseñansa
Di acuerdo cu Rapport Erasmus Consulting & Training di 2020, un total di 43% di loke scolnan ta ricibi, ta inverti den categoria cuater (4), esta pa cumpra materialnan di desaroyo, “hulpmiddel” y necesidadnan di scol. Di e subsidio, un total di 19% ta bay pa paga gasto di limpiesa di edificio y lokaal di scol, mas e pago di coriente, awa y gas y por ultimo 15% ta bay na pago di gasto di mantencion y seguro di edificio di scol y lokaal.
Pa por a fiha e normbedrag nobo Gobierno di Aruba a laga DOW tambe haci e trabounan necesario pa por haci esaki debidamente y conforme loke ley ta prescribi. Den luna di maart 2023, DOW a produci un rapport nobo unda tur scol di SKOA y DPS inicialmente a documenta, esta den cantidad y grandura di klaslokalen y tambe tur otro espacio cu scolnan tin.
E minister a indica cu e intencion ta pa sigui cu documentacion di e otro scolnan den e lunanan nos dilanti. Mescos cu minister a trece padilanti durante di reunion mi ta kier yama DOW pa nan trabou realisa delingentemente y cu nan por a logra produci e rapport pa gobierno den tempo record.
A base di e investigacionnan cu a tuma luga, Gobierno por tuma e decision pa ahusta e normbedrag y a percura pa aloca e fondonan presupuestario necesario pa por ehecuta e decision pa hisa e normbedrag cu un suma totaal di 6.4 miyon florin. Lo otorga esaki e aña aki.
Sigur e ahuste aki ta muestra cu Gabinete Wever-Croes II ta cumpli cu e meta pa sigui duna atencion na e parti di calidad di enseñansa y bin cu solucionnan necesario pa topiconan cu pa hopi aña no a haya e atencion debido. Ta desde aña 2010 no a cambia e normbedrag mas. Mirando e urgencia, importancia y pa proteha e calidad di enseñansa a percura pa e inhaalslag di e ultimo 10 aña.
