Despues di casi 40 aña, Kiwanis Club of Aruba tabatin e honor y privilegio cu un di su miembronan, Robert ‘Bob’ Spellen, por a ocupa e cargo di Gobernador di e districto Oost-Canada y Caribe 2019-2020 (Distinguished Governor ok Kiwanis Eastern Canada and the Caribbean District). Un experiencia unico pa e famia di Kiwanis na Aruba, sinembargo locual a haci esaki mas memorabel ainda ta, cu Bob a ricibi e status di ‘Distinguished Governor’. Logrando e reconocimento aki, memey di un pandemia, tabata un reto mas grandi. El a logra e titulo ‘Distinguished Governor’ cu: dedicacion, comunicacion, confiansa, responsabilidad, credibilidad, hopi empatia y siendo humilde, mas otro responsabilidad.
Spellen a reconoce diferente persona den e districto cu ta consisti di 362 club, cu a destaca den nan trabou na bienestar di nan comunidad, y sigur na su pais tambe tin persona cu merece pa ta reconoci. P’esey e ta un ocasion hopi special pa Gobernador Distingui, Robert Spellen, hunto cu e famia Kiwanis na Aruba, cu ta consisti di cuater club y su miembronan, pa honra 5 persona den nos comunidad den nomber di Kiwanis EC&C. Na e ocasion special di entrega di e reconocimentonan aki, Spellen a hiba un discurso, caminda el a elabora riba e trabou incansabel di e cinco personanan aki, cu durante mas di un aña a brinda e informacion necesario, di tur loke tabata sosodiendo en conexion cu COVID-19.
E personanan cu a ricibi un reconocimento pa nan perseverancia, dedicacion y pa promove salud pa garantisa e siguridad publico ta: Evelyna Wever-Croes, Prome Minister di Aruba, Sharline Koolman-Wever, hefe di e Departamento di Malesanan Contagioso (DBZ), Vanessa N.G. Tjon-Kock, Alto Comisario di Cuerpo Policial di Aruba, Ronella Croes, CEO di Aruba Tourism Authority y Rino Hermans, Bureau Rampenbestrijding Aruba. Hunto cu Crisis Team nan a cumpli cu e tarea importante pa mantene nos comunidad informa di e desaroyo di e pandemia mundial y principalmente riba nos isla.
A tuma e medidanan den consulta cu e Crisis Team, unda despues mester a informa nos pueblo. Esaki ta locual e personanan aki a haci durante 15 luna. Nan a mantene nan mes firme na e decisionnan tuma aunke con duro e tabata y ta gradicido na esaki. Aruba awo ta un ‘role model’ pa varios pais pa e forma con a maneha e situacion di COVID-19.
Danki na e personanan aki, nan liderazgo, dedicacion y nan energia positivo hunto cu henter e Crisis Team, awe nos ta disfrutando di e resultado di nan trabou pa cual nos mester ta hopi orguyoso cu e logro aki. Pa e motibo aki, Robert Spellen a entrega Prome Minister, mr. Evelyna Wever-Croes, un plakkaat tambe pa e entrega na Crisis Team. Gobernador Distingui di Kiwanis EC&C di Kiwanis International
Gobernador Distingui di e region oost-Canada y Caribe di Kiwanis International, Robert Spellen ta gradici e miembronan di Kiwanis Club of Aruba, Kiwanis Club Palm Beach, Kiwanis Young Professionals y Kiwanis Club of San Nicolas pa nan sosten y alabes a gradici su esposa, Mary Spellen, pa e apoyo di semper brinda na su persona.
