Ministerio di Asuntonan Economico, Comunicacion y Desaroyo Sostenibel ta contento di informa cu Minister Geoffrey Wever ta presente na e LGO-EU Forum na Bruselas di 26 di februari 2024 pa 29 di februari 2024.
E delegacion lo consisti di Minister President, Evelyn Wever-Coes, Minister Geoffrey Wever, Minister Plenipotenciario di Aruba na Den Haag, mr. Ady Thijsen y director di Departamento di Asuntonan Economico, Maria Dijkhoff-Pita.
Como e Territorial Authorizing Officer (“TAO”) di Aruba, Minister Geoffrey Wever lo firma un acuerdo a base di cual Aruba lo ricibi un total di 14 miyon di Euro. E fondo aki ta destina pa financia e implementacion di e programa di E-Government na Aruba. Minister Wever como TAO ta responsabel pa tur contact, negociacion y maneho di acuerdonan di financiamento cu Union Europeo.
E iniciativa di E-Government ta un pilar fundamental den e strategia di Aruba pa modernisa e servicionan gubernamental, haciendo nan mas accesibel y eficiente pa su ciudadanonan y ta un proyecto cu ta diseña bou di responsabilidad di Minister President Evelyn Wever Croes como minister encarga cu innovacion, durante Gabinete Wever-Croes I.Awo cu Aruba a logra sigura e 14 miyon di Euro, e proyecto aki por wordo ehecuta.
E firmamento di e acuerdo di financiamento di 14 miyon Euro ta un testimonio di e apoyo di Union Europeo pa Aruba y e importancia di e relacion entre Aruba y Union Europeo, segun Minister Wever.
