Garage Centraal recientemente a organisa un evento como forma di duna danki na su clientela pa nan confianza deposita den nan empresa cu compra di autonan electrico, y na mes momento a duna un demostracion di e seleccion di autonan nobo cu Garage Centraal lo ta ofreciendo.
Rodney Kock, Manager di mercadeo na Garage Centraal tawata hopi satisfecho cu bon acogida cu e evento tawata tin. El a splica riba varios auto nobo cu lo ta riba mercado manera e seleccion di Leapmotors cu modelonan manera e T03 y e C11 Luxury SUV, conoci pa e facilidadnan moderno cu ta ofrece.
Tambe a duna un bista riba dos autonan di Hyundai, esta e Kona Electric cu e IONIQ 5. Un di e facilidadnan innovativo cual a menciona di e Kona Electric ta cu pa medio di un “adapter” por conecta aparato di cas na e auto manera por ehempel: un computer, radio etc. y e auto lo facilita e fuente di coriente pa e aparato por funciona.
Pa locual ta e IONIQ 5, a resalta e importancia di e modelo aki, mencionando cu e auto aki a gana varios premio internacional manera e “Triple Crown Awards” for di prensa specialisa den autonan na nivel global. Ta asina cu IONIQ 5 a gana e premionan di “World Car Of The Year”, World Electric Vehicle Of The Year” ademas di “World Car Design Of The Year.”
Ademas di papia tocante e autonan, a papia di e importancia pa tin e apoyo tecnico. Pa cu esaki Garage Centraal tin un compromiso importante pa su clientela den cual nan por conta riba nan tecniconan capacita y certifica pa Hyundai y Leapmotor, como tambe apoyo di fabrica pa piesa original y tur e aparatonan necesario pa haci e trabou di manera corecto y eficiente, pa tene e auto riba caminda.
Kock a sigui añadi: “Ta importante pa e auto electrico cu lo cumpra ta na un empresa cu lo duna e servicio necesario na e cliente, y cu sosten di fabricante, pa tene e auto riba caminda.”
Pa locual ta e gastonan pa core cu un auto electrico, a indica cu a base di experiencia cu autonan manera e IONIQ, e gasto di coriente dor di recarga e autonan aki lo ta mas cu mita di e inversion den gasolin pa un auto di un tamaño similar, asina e representante a ilustra e aspecto di consumo economico cu autonan electrico ta ofrece.
Riba e pregunta encuanto puntonan di recarga pa e autonan electrico, Kock a splica cu si ta desea di “charge” por haci esaki riba coriente “di cas” (110 volt), y ta conseha pa e proceso di “charge” pa laga esaki tuma luga henter anochi, pa mainta e bateria lo ta completamente recarga. Di otro banda si ta desea pa “charge” den un tempo mas rapido por haci uzo di coriente 220 volt (coriente cu ta uza tipicamente pa airco ) cu e opcion aki e proceso di recarga e bateria lo bay mas lihe. Un otro alternativa di recarga ta e sistema di ELMAR “Type 3” cu tin localidadnan di “charge” rond Aruba, e sistema aki ta carga e bateria di e auto electrico den un tempo hopi corto.
Publico ta bon bini pa pasa pa mira e seleccion di autonan pa cada gusto y deseo, Garage Centraal su personal ta cla pa yuda e cliente scoge e auto di su soño.
