Formador di Gobierno, Evelyn Wever-Croes, a haci e anuncio cu Gabinete Wever-Croes, ta
forma. Durante un conferencia di prensa, hunto cu e otro lidernan di partido POR, Otmar
Oduber y RED, Ricardo Croes, el a gradici tur miembro di prensa presente cu e pasenshi cu
nan a demostra durante full e luna di formacion.
E tabata un formacion cu a tuma su tempo y
den esey tin cu bisa cu a haya e espacio di parti di prensa pa haci e trabao, cual ta di aprecia.
Ta bayendo den direccion di un pais caminda cu prensa ta un pilar importante pa garantisa
democracia y den e cuadro eynan ta sinti cu a cuminsa hopi bon.
Tin un Gobierno. Gabinete Wever-Croes, consistiendo di MEP, POR y RED, ta un realidad.
Wever-Croes a sigui splica cu negociacion no tabata facil. Y ta enfatisa esaki un biaha mas.
A cuminsa como tres partido cu a bay eleccion cu posicionnan propio, cu algun posicion
contradictrio na otro. Hopi posicion igual cu otro y pueblo a papia. No a pidi pa un coalicion,
pero pueblo a duna un coalicion y a tuma e responsabilidad pa forma un coalicion. Den esey,
loke a haci ta, enfoca riba locual ta uni e partidonan.
Kico ta loke nan tin den comun
Loke nan tin den comun, manera cu sa, a cuminsa na firma un acuerdo di formacion, cual a
haci esaki dia 17 di October, despues cu a haya e formatieopdracht dia 12 di October. Cinco
dia despues a firma e acuerdo di formacion, caminda cu a pone den liñanan grandi locual ta
loke lo bay traha pe y despues dia 1 di November, a firma e acuerdo di Gobernacion,
caminda cu a pone e puntonan mas elabora cu lo bay traha riba nan.
Siman pasa diabierna a anuncia cu a keda cla cu reparticion di cartera y a tuma algun dia pa
formalisa tur cos. E procedura berdad a tuma su tempo, pero atrobe, mester a tuma tempo
pe. A enfoca riba e puntonan en comun y eseynan, na prome luga, integridad y bon
gobernacion. Y ora cu ta pone bon gobernacion y integridad number uno, ta pone cu bo
proceso di formacion tambe tin cu tene cuenta cu e puntonan aki como number uno.
Number dos ta e parti financiero di pais Aruba y e gastonan cu mester haya atencion pa
wordo baha, pa por sanea e situacion financiero y e di tres ta pone e ser humano central. E
siguridad di e ser humano, e trankilidad, e cuido medico, e cuido social, enseñansa, vivienda
social. Esey ta locual cu tin cu haya atencion.
Y a realisa cu esaki ta locual cu ta uni e tres partidonan riba esaki, pa sigui traha.
Indudablemente na caminda lo topa cu puntonan cu no a papia di dje. Puntonan cu talbes
nan tin otro opinion y den e caso ey a bin cu e ponencia cu lo bay bin cu un comision cu ta
bay atende cu posibel conflictonan, pa evita cu algo asina mesora ta nifica e final di un
coalicion. Loke a purba di traha riba dje, ta un coalicion stabil y firma pa cuater aña.
