Paleis Huis ten Bosch na Den Haag a tuma luga e huramentacion di e minister- y secretarionan di estado di e gabinete nobo Schoof. E mandatarionan tawata para banda di Rey Willem-Alexander durante e ceremonia di huramentacion. Despues nan a bay uno pa uno dilanti a bisa e palabranan: “zo waarlijk helpe mij God almachtig” ( Dios todopoderoso yuda mi ) of “dat verklaar en beloof ik”” (esey mi ta declara y priminti).
Tawata posibel pa e mandatarionan contesta tambe na idioma Fries, cu ta e di dos idioma oficial di Hulanda. E minister nobo di Agricultura (Landbouw) Femke Wiersma, y Secretario di Estado Folkert Idsinga di Asuntonan Fiscal y Douane (Fiscaliteit en Douane) a haci esaki.
E gabinete nobo ta consisti di 16 minister y 13 secretario di estado. Fuera di e premier Schoof cu no ta asocia na un partido, tin cinco minister y cuater secretario di estado na nomber di PVV. Cuater minister y tres secretario di estado na nomber di VVD. Igualmente, tin cuater minister y tres secretario di estado na nomber di NSDC y dos minister y tres secretario di estado na nomber di BBB.
E formacion a dura total 223 dia, Esaki ta relativamente largo, pero no tin un record: e formacion anterior di gabinete Rutte 4, a logra keda cla despues di 299 dia.
Fotonan cortesia: Gobierno Hulandes
