Na Aruba e devocion na Venerable José Gregorio Hernández a cuminsa na Tanki Leendert 128, na cas di. Juan y Seferina Croes d.f.m. Na aña 1967, Sefereina Croes, kende tabata sufri di un enfermedad incurabel segun dokternan. El a pidi yudansa na Tata Celestial pa medio di Siervo di Dios, José Gregorio Hernández. Seferina y su casa Juan, cariñosamente yama Juancito, a priminti di plama su devocion y traha un Sitio di Oracion p’e, si e haya ayudo cu su enfermedad.
Dia 23 di april 1967 Seferina a haya e gracia special di Dios, cu curacion di su enfermedad pa intercesion di dr. José Gregorio Hernández. P’esey e pareha a cumpli cu e promesa y dia 29 di juni 1969 nan a organisa un fiesta solem pa conmemora e di 50 aña di fayecimento di e siervo di Dios, José Gregorio Hernández y asina a cuminsa cu e luga. Tur hende por a bin pa resa y haci obra na esnan di menos recurso. Te cu awe tur hende conoce e luga como Sitio di Oracion, situa na T.L.128, cu a cuminsa den e garashi.
Na aña 1970 famia Croes a cuminsa cu peregrinacion pa Isnotu, Estado Trujillo, Venezuela, e luga caminda dr. José Gregorio Hernández a nace y asina peregrinacion a sigui te na aña 2014.
Na 1973 nan a lanta un Stichting bou di e nomber di “Fundacion Dr. José Gregorio Hernández”. Y te ainda tin un miembro di e directiva ey na bida. Lamentablemente na 1974, Juancito Croes a fayece. Y na 1993 ora Sra. Croes a bira malo, a bin un directiva y a cambia e nomber pa Fundacion Venerable José Gregorio Hernández, ya cu na januari 1986, a declar’e Venerable. Sra. Seferina Croes mes a fayece na december 1995.
E directiva nobo a traha duro bendiendo cuminda, bolo, rifa y semper nos pueblo a coopera hopi bon mes cu nos. Door di esaki e Fundacion por a cumpra e edificio for di herederonan Croes, dia 31 di mei 1996.
Na 2002 nos tabatin reapertura di e bunita Sitio di Oracion, cu ainda tabata falta basta trabao pa haci y fuera di esey, mester a paga un banco tambe. E pueblo a sigui coopera cu contribucion pa luna di minimo f.5,00 te f.100,00 pa luna. Di e forma aki, nos por a cumpli cu nos debernan. Otro organisacionnan tambe sa uza e luga pa duna charla pa hubentud, etc.
Na october 2004, nos a reuni mas of menos 150 mucha di tur rond di Aruba, pa nan bin pasa un dia feliz. Na aña 2006 nos a trece 200 mucha di 5 te 12 aña hunto durante vakantie grandi y tur a bay cas feliz cu nan tas y articulonan pa school. Despues tabata difícil pa nos por a sigui haci esaki. Te ainda nos ta yuda algun mucha cu nan uniform pa school y den december tambe. Caminda cu por, nos ta yuda! Na januari 2005, nos a cuminsa haci nos grandinan feliz riba dia di Tres Rey, y asina nos a sigui cada aña.
Nos ta agradecido na e contribuyentenan cu te ainda ta yuda nos, pa nos por sigui cu mantencion di e edificio, ya cu nos no ta haya subsidio. Boso yudansa semper ta bon bini. Y bo por bira contribuyente mensual of anual. Bo por tuma contacto cu nos pa mas informacion. Dia 30 di april 2021 papa a beatifica dr. José Gregorio Hernández y tur diaranson nos tin oracion of santa misa pa 7:00 pm. Pa aña, nos ta haci un nobena na su honor. Den transcurso di e aña aki, a haci hopi cambio na e Sitio di Oracion, y ta danki na boso ayudo, nos por a yega na e dia grandi aki.
Nos ta spera nos rumannan sin falta, pa recorda tur gracia, fabor y milagro cu nos Señor a regala nos, pa medio di Beato José Gregorio Hernández y tambe pa comparti cu otro, e bunita experencianan. Lo tin tres dia di oracion, sigui pa santa misa dianan 26- 27 – 28 di juni 2024 y lo tin un Santo sacrificio di misa pa gradici nos Tata Celestial dia 29 di juni pa 10:00 am, pa pidi pa forsa spiritual y fisico. Cu boso yudansa, nos lo sigui cu e Sitio di Oracion y nos trabao. Bendicion!
