E situacion financiero di Fundacion Rancho ta uno precario. Presidente Clifford Rosa a indica cu en berdad actualmente a habri september 2022 cu un tiki preocupacion, mirando cu e fondonan cu ta haya normalmente fo’i dunadonan di fondo, a caba dia 31 di augustus ultimo.
Rosa a indica cu tin di compronde cu a traha 12 aña como fundacion sin subsidio regula y actualmente, despues di a haci basta proyecto ta den e posicion cu e fondonan a caba. Con por haci e traspaso pa por sigui haci actividad y e proyectonan, t’e gran pregunta.
Segun Rosa, pa Fundacion Rancho ta dolor, mirando cu e proyecto aki yama Centro di Actividad Rancho desde 2016, t’e proyecto cu ta haci tur cos p’e fundacion. E ta draai e parti di marshe, e ta draai tur e actividadnan cu tin. Como proyecto por bisa cu e hendenan mes por mira kico a logra y kico no. Esey t’e proceso aworaki.
Loke nan kier sa con por continua ta sostenibel pa mantene un di e proyectonan, esta Centro di Actividad Rancho, pero tambe den e area caminda cu e ta algo diferente.
Aña pasa, tempo cu a habri, por a mira e potencial comercial, pero como fundacion cu ta puramente traha door di boluntario, ta un organisacion cu ta bisa cu ta traha den e comunidad p’e comunidad sin un fondo structura y no cu fondo di gobierno.
Ta dificil, segun Rosa, pero a mira e potencial aki dje parti comercial. A pensa cu ta evalua como fundacion tin cu bay den e direccion comercial mirando cu ta den e spot, mirando e turismo y e desaroyo cu tin aworaki despues di e pandemia.
